Rinumërimi i të gjitha kutive për partitë dhe kandidatët në Tiranë nuk do të nisë menjëherë, pasi KQZ-ja kërkon mbi një javë kohë për përgatitjen logjistike dhe gjetjen e një vendi të përshtatshëm.
Burime zyrtare bënë me dije se po shqyrtohet mundësia që Parku Olimpik, ku më herët u numëruan votat e diasporës, të përdoret për këtë proces.
Për mikrofonin e RTSH, eksperti zgjedhor Andon Kume sqaron bazën ligjore mbi të cilën u mor vendimi.
“Është hera e parë që rinumërohen vota në një mënyrë kaq të madhe. Kemi pasur edhe më përpara rivlerësim dhe rinumërim të votave të qendrave ose zonave të caktuara të votimit, por jo në mënyrë kaq të madhe. Kjo do të bëjë që Komisioni Qendror i Zgjedhjeve tashmë do të ngrejë grupet e tij të numërimit me anëtarë të administratës së KQZ-së. Pra, grupet e numërimit do të jenë jopartiake. Partitë politike do të kenë vetëm të drejtën të vëzhgojnë. Ky parashikim ligjor është vendosur si një formë garancie për opozitën që të mos ndodhet në një situatë ku kërkesat e tyre për rinumërimin e votave të mos marrin dot shumicën,” shprehet z. Kume.
Eksperti shton se rinumërimi mund të ndryshojë tabelën përmbledhëse dhe nëse konstatohen gabime do të nisë procesi tjetër, që është ai penal.
“Do të jetë e vështirë që të kemi ndryshime të rezultatit për subjektet politike, por do të kemi ndryshime për sa i përket kandidatëve për vota preferenciale. Do të shikojmë se deri në çfarë grade ka pasur gabime, sepse nëse do të kemi gradë të lartë të gabueshmërisë dhe do të vërtetohen që gabime nuk janë njerëzore, por janë të qëllimshme, absolutisht që pas këtij procesi vjen një proces tjetër, që është procesi penal kundrejt grupeve të numërimit të votave,” thotë z. Kume.
Leave a Reply