Ministri i Brendshëm, Ervin Hoxha, falënderoi tw enjten nw Kuvend qytetarët shqiptarë brenda dhe jashtë vendit për pjesëmarrjen masive në zgjedhjet parlamentare të 11 majit, duke e cilësuar atë si “themelin e demokracisë dhe një dëshmi të qartë të besimit të tyre për shtetin e së drejtës”. Në fjalën e tij në seancën plenare të Kuvendit, Hoxha theksoi angazhimin e Ministrisë së Brendshme për mbarëvajtjen e procesit zgjedhor, duke konfirmuar përmbushjen e detyrimeve kyçe që lidhen me fushën e përgjegjësisë së kësaj ministrie.
Përgatitja dhe lehtësimi i procesit zgjedhor
Ministri Hoxha veçoi hartimin e listave të plota dhe të sakta zgjedhore, si brenda vendit ashtu edhe për diasporën, si një arritje të rëndësishme. Ai theksoi gjithashtu përpjekjet e ministrisë për pajisjen dhe rinovimin e dokumenteve të identifikimit, duke ndërmarrë fushata ndërgjegjësimi dhe ndërhyrje ligjore për të lehtësuar procedurat për qytetarët dhe procesin zgjedhor.
Në kuadër të masave për mbarëvajtjen e procesit, Hoxha bëri me dije se “javët e fundit kemi ndërmarrë akte normative përkatëse për zgjatjen e afateve të vlefshmërisë për letërnjoftimet elektronike dhe pasaportat biometrike”. Këto akte, fillimisht të miratuara në shkurt për shtetasit shqiptarë brenda dhe jashtë vendit, u shtrinë më pas edhe për ata me banim të përhershëm brenda territorit shtetëror, duke garantuar të drejtën kushtetuese për të votuar për çdo zgjedhës, pavarësisht dokumentit biometrik me afat vlefshmërie të skaduar deri në datën 11 maj.
Hoxha kërkoi nga Kuvendi miratimin përfundimtar të këtyre akteve, “me qëllim që ky proces të marrë formë të plotë institucionale dhe këto akte të formalizohen”.
Standarde të reja për sigurinë elektorale
Zgjedhjet e 11 majit u vlerësuan nga Ministri Hoxha si “një provë e rëndësishme për institucionet ligjzbatuese”, duke theksuar se kjo ishte “një nga periudhat zgjedhore më të qeta e më të mbikëqyrura ndonjëherë”. Ai evidentoi vendosjen e standardeve të reja për sigurinë elektorale, nëpërmjet hartimit dhe zbatimit të një plani të detajuar operacional në bashkëpunim të ngushtë me KQZ-në, Prokurorinë e Posaçme dhe prokuroritë e rretheve gjyqësore.
Masat e ndërmarra përfshinin rritjen e pranisë policore në zonat me ndjeshmëri, me “zero tolerancë për ndërhyrje nga jashtë në këtë proces”, si dhe krijimin e grupeve të punës për të monitoruar dhe parandaluar çdo tentativë për deformimin e vullnetit të votuesve. Hoxha theksoi gjithashtu se pati “një angazhim të palëkundur për bashkëpunim të plotë me institucionet e drejtësisë për hetimin dhe ndjekjen penale të çdo akti që do të cenonte integritetin zgjedhor”.
Ai shtoi se janë bërë referime të menjëhershme dhe hetime të shpejta në kohë reale për veprimtari të dyshuara penale, përfshi raste të fotografimit të votës. Kjo, sipas Hoxhës, dëshmon se “askush nuk është mbi ligjin dhe do të përballet gjithmonë me të kush cenon të drejtën e votës së lirë”, duke shtuar se “ky ishte një mesazh i qartë i qeverisë për të ndarë politikën nga çdo tentativë që synonte cenimin e legjitimitetit të votës”.
Leave a Reply