Policia e Shtetit, nëpërmjet një njoftimi për shtyp, bëri të ditur të dielën se muaji maj 2025 ka shënuar një periudhë me punë intensive dhe rezultate të prekshme, shprehje e angazhimit maksimal, sipas saj, “në luftën kundër krimit dhe garantimin e sigurisë publike”.
Krahas operacioneve ndaj krimit të organizuar dhe fenomeneve kriminale me impakt të lartë, Policia ka luajtur një rol kyç në mbarëvajtjen e ngjarjeve me rëndësi kombëtare dhe ndërkombëtare, duke forcuar imazhin e vendit.
Aksione policore dhe goditje ndaj krimit
Gjatë muajit maj, Policia e Shtetit ka finalizuar 99 operacione policore në total, ku 34 prej tyre ishin me përmasa ndërkombëtare, dëshmi e bashkëpunimit efektiv me partnerët globalë. Këto aksione çuan në vënien në pranga të 625 autorëve të dyshuar të veprave penale.
“Në kuadër të luftës kundër armëmbajtjes pa leje dhe trafikimit të lëndëve narkotike, janë sekuestruar 50 armë zjarri dhe një sasi e konsiderueshme municioni luftarak. Rreth 84 kilogramë kanabis, qindra doza të kësaj lënde dhe kokaine, si dhe 2861 fara kanabisi janë bllokuar, duke goditur rëndë rrjetet e shpërndarjes së drogës. Gjithashtu, janë sekuestruar rreth 415,000 euro në para dhe pasuri me burime të dyshimta kriminale, si dhe mallra të kontrabanduara, antiplumb, silenciatorë, dokumente dhe para false.”, thuhet në njoftimin e policisë.
Sipas uniformave blu, një sukses i veçantë është shënuar me megaoperacionin kombëtar “Koordinata”, ku janë asgjësuar 8269 bimë/fidanë kanabisi, duke dhënë një goditje të fortë kultivimit të paligjshëm.
“Aspekti i armëve pa leje ka qenë në fokus të veçantë, me 3 operacione në Tiranë dhe Shkodër që çuan në arrestimin e 13 shtetasve të përfshirë në trafikim apo shitje armësh për grupet kriminale. Një tjetër operacion i suksesshëm në Durrës, i koordinuar me Forcën e Posaçme Operacionale, arrestoi 7 persona, tre prej të cilëve me rrezikshmëri të lartë, të cilët u kapën me armë zjarri gati për qitje.”, theksohet në njoftim.
Përveç këtyre, Policia ka parandaluar përshkallëzimin e 8 konflikteve, duke përfshirë ato familjare dhe ato me armë zjarri.
Janë zbardhur 10 ngjarje kriminale të rënda, si shpërthime me eksploziv, plagosje, vetëplagosje, djegie të qëllimshme automjetesh dhe aksidente rrugore me largim nga vendi i ngjarjes.
Janë zbuluar gjithashtu një banesë e përshtatur për kultivim kanabisi në Fier dhe një “call center” për mashtrime kompjuterike në Tiranë.
“Gjatë majit, janë finalizuar edhe 22 operacione për zbardhjen e vjedhjeve, 13 raste të tentativës për kontrabandë mallrash në pikat kufitare, 2 operacione kundër organizimit të paligjshëm të lojërave të fatit dhe 2 kundër transportimit të emigrantëve të paligjshëm. Policia e Qarkut Vlorë ka dhënë ndihmë në 4 raste për shtetas në vështirësi, ndërsa në bashkëpunim me institucionet e tjera, janë trajtuar 181 raste të dhunës në familje dhe 217 krime kundër mjedisit.”, njofton policia.
Angazhimi në ngjarje kryesore
Muaji maj 2025 u karakterizua edhe nga disa ngjarje me ndikim të madh në imazhin e Shqipërisë, ku Policia e Shtetit luajti një rol thelbësor në garantimin e rendit dhe sigurisë:
- Gara ndërkombëtare Giro d’Italia: Siguria e pjesëmarrësve dhe publike ishte e garantuar gjatë këtij eventi madhor sportiv.
- Zgjedhjet për Kuvendin e Shqipërisë: Policia siguroi një proces zgjedhor të qetë dhe të rregullt.
- Samiti i Komunitetit Politik Evropian: Rendi dhe siguria e delegacioneve dhe e zonave ku u zhvillua samiti u garantua në mënyrë shembullore.
- Turi i 82-të çiklistik: Një tjetër event sportiv ku Policia ndihmoi në mbarëvajtjen dhe sigurinë.
Siguria rrugore dhe kontrolli kufitar
Policia Rrugore, duke përdorur flotën e pajisjeve inteligjente, ka monitoruar vazhdimisht akset rrugore me objektivin kryesor: sigurinë rrugore. Si rezultat, janë vënë në pranga 155 drejtues mjetesh, prej të cilëve 107 për drejtim mjeti në gjendje të dehur dhe 48 për drejtim mjeti pa leje drejtimi. Janë pezulluar gjithashtu 191 leje drejtimi për tejkalim shpejtësie, drejtim mjeti nën ndikimin e alkoolit dhe shkelje të tjera të Kodit Rrugor. Për shpejtësi mbi normat e lejuara, janë dhënë 12,440 masa administrative, ku drejtuesit janë penalizuar me gjoba dhe ulje pikësh nga leja e drejtimit.
Policia Kufitare ka zbatuar analiza të posaçme risku dhe ka kryer kontrolle intensive, duke goditur krimin në kufi. Janë evidentuar dhe goditur 50 raste të kalimit të paligjshëm të kufijve, 22 raste të tentativës për kalim kufiri me dokumente false dhe 6 raste të trafikimit të mjeteve motorike.
Thirrje për bashkëpunim
Policia e Shtetit rikonfirmon angazhimin e saj maksimal për goditjen e krimit në përgjithësi dhe atij të organizuar në veçanti. Në këtë kontekst, ajo ka ftuar qytetarët që të denoncojnë çdo paligjshmëri dhe të informojnë Policinë për çdo rast nevoje, pasi ndërhyrja dhe asistenca do të jenë të menjëhershme.
Leave a Reply