Ministrja e Turizmit dhe Mjedisit, Mirela Kumbaro, deklaroi në Kuvend se projektligji për ruajtjen e biodiversitetit të zonave detare ka për qëllim jo vetëm ruajtjen e diversitetit biologjik, i cili po rrezikohet nga ndotja dhe ndryshimet klimatike, por edhe shtimin e sipërfaqes detare të mbrojtur në vend.
Kumbaro tha se ky projketligj vjen si rrjedhojë e pjesëmarrjes së Shqipërisë në Konventën e OKB-së dhe do të përmirësojë jo vetëm bashkëpunimin por edhe rritjen e aftësive dhe kapaciteteve në fushën e mbrojtjes së mjedisit.
“Duhet ta nxjerrim këtë projektligj si një ndër arritjet e Shqipërisë, pasi ka përfaqësuar kauzën e mbrojtjes së biodiversitetit në det. Humbja dhe degradimi i biodiversitetit në det për shkak të ndryshimeve klimatike dhe ndotjes së tyre ka si objektiv ruajtjen e këtij biodiversiteti. Shqipëria tregon modelin se si mund të jemi mbrojtës të mjedisit dhe zhvillimit të qëndrueshëm. Marrëveshja përcakton kornizën ligjore në raport me madhësinë dhe vijën detare që ka, që përtej mbrojtjes së hapësirave tokësore të lumenjve dhe pyjeve, të shtojmë edhe sipërfaqen mbrojtëse të parqeve detare, ku kemi dy: atë të Porto Palermos dhe Karaburun-Sazanit. Kjo marrëveshje ofron bashkëpunim të zgjeruar në konventën për të drejtën e detit, krijimin e zonave të tjera të mbrojtura detare, ndikimet në mjedis dhe burimet energjetike detare për trajtimin e këtyre çështjeve”, tha Kumbaro.
Projektligji u përball me kritika nga opozita, ku deputeti demokrat Flamur Noka, e cilësoi iniciativën si një përpjekje për përfitime të fshehta ekonomike përmes tenderave.
“Tema është me koncesion, ndonjë tender, ndonjë panel diellor, ndonjë copë deti ta rrëmbeni, kjo është në axhendën e mazhorancës. Për opozitën është e papranueshme që Shqipëria, vend i NATO-s, të varrosë votën e lirë dhe zgjedhjet e lira. Me vullnetin tuaj politik, nga etja e sulltanit tuaj për t’u kacavjerrë me çdo kusht pas karriges, është gjymtuar demokracia”, tha Noka.
Nga ana tjetër deputeti socialist Tonin Gogu vlerësoi projektligjin si renditje të Shqipërisë përkrahë vendeve evropiane për mbrojte të mjedisit dhe forcim të bashkëpunimit.
“Shqipëria është pararojë e integrimit evropian dhe kjo u tha nga Parlamenti Evropian me progres raportin më të mirë që kanë miratuar ndonjëherë. Shqipëria nuk është bishti i Ballkanit, por kreu i rajonit në paradhomën evropiane. Projektet që vijnë sot janë projekte pune si biodiversiteti i zonave detare që është një nga sfidat evropiane dhe ne vlerësohemi që po ndeshemi bashkë me ta siç po e bëjmë me emigracionin, klime, energjinë. Teksa flasim për biodiversitetin nënshkruaj një marrëveshje si pjesë e konventës që bëjmë pjesë, janë investime në rritjen e kapaciteteve dhe aftësive në këtë drejtim”, tha Gogu.
Leave a Reply