Fluturimi i parë i kompanisë “Vueling” nga Barcelona drejt Tiranës, u ul dje në pistën e Aeroportit Ndërkombëtar të Tiranës (TIA). TIA njofton se “me katër fluturime në javë nga Barcelona, ky partneritet i ri forcon lidhjet e Shqipërisë me Spanjën dhe Europën përmes aeroportit El Prat, duke sjellë më shumë mundësi për udhëtarët”.
Fluturimi inaugurues nga Barcelona drejt Tiranës shënon hyrjen zyrtare të “Vueling” në tregun shqiptar dhe shton një aktor të ri të rëndësishëm në rrjetin në rritje të TIA-s.
TIA njofton se si pjesë e grupit IAG dhe me Barcelonën si qendër kryesore, “Vueling” ofron një lidhje të gjerë nëpër Evropë. Prezantimi i fluturimeve të drejtpërdrejta midis Tiranës dhe Barcelonës, që operojnë katër herë në javë (të hënë, të mërkurë, të premte dhe të dielë), u ofron udhëtarëve shqiptarë akses më të gjerë jo vetëm drejt Spanjës, por edhe lidhjeve të mëtejshme nëpër Evropë përmes aeroportit El Prat.
“Jemi jashtëzakonisht të lumtur që inaugurojmë këtë shërbim të ri të drejtpërdrejtë midis Barcelonës dhe Tiranës. Shqipëria po fiton gjithnjë e më shumë interes nga udhëtarët evropianë, dhe jemi krenarë që po i afrojmë këto dy qytete dinamike më shumë se kurrë. Si qendra kryesore e Vueling, Barcelona mbetet e përkushtuar për të rritur lidhjet rajonale, duke ofruar tashmë për udhëtarët nga Tirana një mënyrë të lehtë dhe të qasshme për të zbuluar qytetin tonë”, tha Jordi Pla, shef i Rrjetit dhe Strategjisë në “Vueling”.
