Kryetari i Bashkisë së Tiranës, Erion Veliaj, e humbi sot betejën në kërkim të lirisë në Gjykatën e Lartë dhe do t’i duhet të presë në arrest në burg vijimin e hetimeve që Prokuroria e Posacme po kryen ndaj tij. I konfirmuar në të tre shkallët e gjyqësorit, arrestimi i Erion Veliajt, krahas anës ligjore dhe personale, tashmë risjell në qendër të debatit politik edhe fatin e mëtejshëm të Bashkisë së Tiranës, njësia më e madhe vendore e Shqipërisë.
Prej 10 shkurtit 2025, pra për pesë muaj, kryeministri Rama ka refuzuar të ndërmarrë hapa që do të zgjidhnin cështjen e drejtimit të bashkisë së kryeqytetit. Në krye të saj vijon të jetë një nënkryetare e komanduar, ndërsa Erion Veliaj ishte në pritje të konsumimit të hapave ligjore për masën e sigurisë të kërkuar nga SPAK dhe të konfirmuar nga gjykata. Tashmë që hapat ligjorë për të fituar lirinë apo të paktën qëndrimin në shtëpi në pritje të gjykimit janë konsumuar për momentin, duket se topi ka kaluar te zgjidhjet politike. Po cilat janë ato:
1 – Mundësia e parë është që kryebashkiaku Veliaj të japë dorëheqjen, duke “kuptuar” rëndësinë e situatës dhe nevojën që Tirana të ketë një drejtim normal dhe të përditshëm. Kjo do ta dërgonte Tiranën drejt zgjedhjeve të parakohshme për pjesën e mbetur të mandatit të kryebashkiakut, pra për më pak se 2 vjet, derisa në pranverën e vitit 2027 të rivotohet.
2 – Këshilli i Ministrave mund ta shkarkojë kryetarin e Bashkisë së Tiranës për të mundësuar dërgimin e njësisë vendore drejt zgjedhjeve. Një hap që duket vështirë të ndodhë në kushtet aktuale, pasi qeverisë i mungojnë arsyet ligjore që përcakton Kushtetuta dhe kuadri ligjor. Gjithashtu, një hap i tillë do të dëshmonte divergjencat mes Ramës dhe Veliajt, i cili do të refuzonte dhënien e dorëheqjes, duke e detyruar Kryeministrit ta shkarkojë.
3 – Këshilli Bashkiak do të investohet për shkarkimin e kryebashkiakut Veliaj për mungesën në detyrë, sic kërkon tashmë edhe opozita. Një hap i tillë duket i vështirë të ndodhë, pasi përtej debatit ligjor mbi mundësinë që ka Këshilli Bashkiak të bëjë ose jo shkarkimin, largimi i Veliajt nga parlamenti i qytetit, duke plotësuar kërkesën e opozitës, do të shihej si një fitore e saj.
4 – Situata do të mbetet e njëjtë, me kompetenca të deleguara dhe një nga nënkryetarët që ushtron detyrën. Ky skenar ka funksionuar prej 5 muajsh, por ka vështirësitë e tij praktike të administrimit të qytetit dhe vëllimit të punës, jo të vogël.
Ndaj dorëheqja e Erion Veliaj duket se mbetet opsioni më i mirë për të gjithë, me përjashtim të vetë kryebashkiakut të arrestuar, të cilit do t’i duhet të gjejë fjalë për të njoftuar largimin, por edhe të ndërtojë një strategji për të mbetur “në lojë” edhe pa post.
