“Nvidia” arriti të mërkurën për një kohë të shkurtër vlerën e tregut prej 4 trilionë dollarë, duke u bërë kompania e parë e kuotuar në bursë që mbërrin në këtë nivel. Aksionet e kompanisë u rritën me 2.76 % pas hapjes së tregjeve të mërkurën për të kapur në mesditë rekordin, që e dërgoi vlerën e “Nvidia” në 4 trilion dollarë.
Më pas gjatë ditës së shkëmbimeve shifrat ndryshuan dhe mbyllja ishte me një rritje 1.8 % të vlerës së aksioneve, duke e cuar vlerën e kompanisë pak nën 4 trilion dollarë.
Në këtë mënyrë, “Nvidia” mundi “Apple” dhe “Microsoft” për kapjen e nivelit 4 trilion dollarë. “Apple” mbërriti gjatë vitit deri në nivelin 3.9 trilionë dollarë, përpara se të niste beteja e tarifave.
“Nvidia” dhe “Microsoft” kanë ndryshuar shpesh vendin e parë të kompanisë më të vlefshme në treg, por “Nvidia” ia arriti të kapë e para vlerën 4 trilionë dollarë.
