Politologu Afrim Krasniqi ka publikuar sot përmbajtjen e një rezolute të Parlamentit Europian për zhvillimet në Shqipëri, miratuar 40 vjet më parë, teksa Tirana ishte në kulmin e krizës së ambasadave., ku mijëra qytetarë hynë selitë e huaja diplomatike.
“Rezolutë e Parlamentit Europian mbi Shqipërinë. Shkurt, shqip dhe qartë. Për krizën, për përgjegjësitë, për dhunën, për të drejtat e njeriut, për ata që guxuan dhe për zgjidhjen. Në atë kohë pjesë e PE-së ishin vetëm vendet perëndimore. Dhe kjo, është rezoluta e parë e parlamentit europian mbi Shqipërinë dhe për Shqipërinë”, shkruan Krasniqi.
Politologu shton se lajmi mbi rezolutën e korrikut 1990 nuk u publikua në mediat zyrtare dhe as u citua në ndonjë artikull/debat/intervistë gjatë pjesës tjetër të verë 1990. “Akti u pasua me vizitën e një delegacioni amerikan, i cili me të njëjtën gjuhë dhe për të njëjtat arsye/kritere hartoi një raport kritik ndaj Tiranës zyrtare. Thelbi, Alia dhe regjimi i tij janë pengesa dhe problemi. Ndërsa refuzoi pranimin e kushteve për anëtarësim në KSBE, regjimi pati sukses në bisedimet dymujore për të rivendosur me 30 korrik marrëdhëniet me Bashkimin Sovjetik. Ky i fundit na kuptonte dhe na pranonte “kështu siç jemi”, ishte teza zyrtare”, shprehet Krasniqi.
