Nga kuzhinat e Italisë tek agroturizmi në tokën e tij, Fundim Gjepali, në një intervistë për revistën italiane “Gambero Rosso”, cilësohet si një histori suksesi, për kontributin që jep në kulinarinë shqiptare.
Ministrja e Bujqësisë dhe Zhvillimit Rural, Anila Denaj, ndau në rrjete sociale artikullin e medias italiane që i kushton një vend të veçantë promovimit të kulinarisë shqiptare.
“Fundimi me pasionin, talentin e tij dhe me përkushtimin dhe dashurinë për tokën shqiptare, po kontribuon për vendin, në një kohë kur turizmi masiv po ndryshon peizazhin ekonomik dhe shoqëror të vendit”, shkroi Denaj.
“Pas tre dekadash përvoje si shef në restorante të njohura ndërkombëtare , ai ka investuar në “Agroturizëm Gjepali”, një model frymëzimi për të gjithë ata sipërmarrës që duan të kontribuojnë në zhvillimin rural, përmes rikthimit te tradita dhe fuqizimit të produkteve vendase”, tha ministrja.
Denaj u shpreh se, shembulli i tij tregon se bujqësia dhe gastronomia shqiptare kanë potencial jo vetëm për të rritur ekonominë vendase, por për të ndërtuar një Shqipëri turistike, moderne dhe me identitet të fortë.
