Presidenti amerikan Donald Trump ka nxitur Presidentin ukrainas, Volodimir Zelenski, të godasë më thellë në territorin rus. Sipas shtypit ndërkombëtar, gjatë një bisede më 4 korrik, Trump i është drejtuar Presidentit Zelenski me pyetjen nëse mund të goditej Moska apo Shën Petersburgu.
Nga ana e tij, Zelenski ka kërkuar armatime shtesë, një pjesë e të cilave do të mbërrijnë në Ukrainë nëpërmjet NATO-s.
Trump përsëriti, në një intervistë me BBC-në zhgënjimin e tij me homologun e tij rus Vladimir Putin për luftën e vazhdueshme në Ukrainë, por shtoi se nuk ishte ende gati të distancohej.
“Jam i zhgënjyer, por nuk kam mbaruar ende punë me të”, tha Trump. “Jam i zhgënjyer”, përsëriti ai.
I shtyrë për të shpjeguar se si synon t’i japë fund asaj që e quan “gjakderdhja” e luftës ruso-ukrainase, përgjigjja ishte se “ne po punojmë për këtë”.
Trump më pas u kthye te historia e bisedës së tij të fundit telefonike me presidentin rus.
“Patëm një bisedë të shkëlqyer. Thashë, mirë, mendoj se jemi gati t’i afrohemi përfundimit të luftës. Dhe pastaj ai shembi një ndërtesë në Kiev”, tha presidenti amerikan.
I pyetur për NATO-n, të cilën më parë e kishte quajtur “të vjetruar”, Trump shpjegoi se kishte ndryshuar mendje, duke pretenduar se presioni i tij ishte për shkak të faktit se Aleanca Atlantike po bëhej e kundërta e së vjetrës, një organizatë në të cilën të gjithë i paguajnë faturat e veta”.
