Departamenti i Shtetit feston sot 236-vjetorin

Departamenti amerikan i Shtetit feston sot 236-vjetorin e krijimit, duke mbajtur edhe rekordin e agjencisë më të vjeter të qeverisë amerikane.

I krijuar më 27 korrik 1789 si Departamenti i Punëve të Jashtme, pas firmës së Presidentit Xhorxh Uashington (#GeorgeWashington) në ligjin përkatës, kjo ishte agjencia e parë e krijuar me hyrjen në fuqi të Kushtetutës së Shteteve të Bashkuara. Pak muaj më vonë, emri i agjencisë ndryshoi në Departamenti i Shtetit.

Misioni i Departamentit të Shtetit është “të mbrojë dhe nxisë sigurinë e Shteteve të Bashkuara, prosperitetin e vlerat demokratike dhe të ndërtojë një mjedis ndërkombëtar në të cilin të gjithë amerikanët mund të lulëzojnë”.

Sot, agjencia e famshme e qeverisë amerikane, përfshin 13 mijë punonjës nga Shërbimi i Jashtëm, 11 mijë punonjës nga Shërbimi Civil dhe 45 mijë persona si staf vendor, të punësuar në mbi 270 misione diplomatike anembanë botës.

Pavarësisht fokusit në politikën e jashtme, Departamenti i Shtetit ka ende disa detyra dhe angazhime të qeverisjes së brendshme, si mbajtja e Vulës së Madhe te SHBA.

Gjithashtu, Sekretari i Shtetit është depozitari i dorëheqjes së Presidentit të SHBA-së. Ne rastin e largimit nga Shtëpia e Bardhë të Riçard Niksonit (#RichardNixon) në vitin 1974, ai e depozitoi letrën e dorëheqjes te Sekretari i Shtetit, Henri Kisinger (Henry Kissinger).