Sulmet ajrore izraelite vranë sot (e hënë) të paktën 34 palestinezë në disa zona të Gazës bënë të ditur zyrtarë lokalë të shëndetësisë, një ditë pasi Izraeli lehtësoi disa kufizime për ndihmat, përballë krizës humanitare në përkeqësim, sipas AP-së.
Izraeli njoftoi dje se ushtria do të ndalonte operacionet në qytetin e Gazës, Deir al-Balah dhe Muwasi për 10 orë çdo ditë, deri në një njoftim të dytë, për të lehtësuar shpërndarjen e ndihmave për palestinezët, ku shqetësimi për urinë është rritur. Gjithashtu u përcaktuan rrugë të sigurta për dërgimin e ndihmave.
Izraeli deklaroi se operacionet ushtarake do të vazhdojnë paralelisht me masat e reja humanitare. Ushtria izraelite nuk komentoi menjëherë për sulmet e fundit, të cilat ndodhën jashtë fashës orare të pauzës që ishte shpallur nga ora 10:00 deri në 20:00.
Agjencitë e ndihmave e mirëpritën lehtësimin e kufizimeve, që përfshinin edhe hedhje të ndihmave nga ajri, por thanë se ato nuk janë të mjaftueshme për të përballuar rritjen e urisë në territorin palestinez.
Izraeli ka kufizuar ndihmat në nivele të ndryshme gjatë gjithë luftës. Në mars, ndaloi hyrjen e të gjitha mallrave, përfshirë karburantin, ushqimin dhe barnat, për të ushtruar presion mbi “Hamas”- in që të lironte pengjet.
Leave a Reply