Gjatë ditëve të fundit gazetarë, shkrimtarë, përkthyes dhe intelektualë të shumtë, kanë shprehur solidaritetin publik për gjendjen shëndetësore dhe situatën e vështirë ekonomike e sociale në të cilën gjendet personaliteti i letrave Bujar Xhaferaj. Nevoja për përballimin financiar të një ndërhyrjeje mjekësore i ka shtyrë miqtë e publicistit, poetit dhe poliglotit Xhaferaj për tërheqjen e vëmendjes së institucioneve.
Unioni i Gazetarëve Shqiptarë para një viti ka depozituar zyrtarisht propozimin që kolegu Xhaferaj të përfitojë pensionin e posacëm.
Po publikojmë propozimin zyrtar, drejtuar Kryeministrit të vendit për këtë vlerësim të merituar ndaj njerit ndër themeluesve të shtypit të lirë në fillimvitet ‘90 dhe një poeti e shkrimtari që ka spikatur për forcën dhe peshën specifike të fjalës dhe mendimit të lirë në Shqipërinë e mbi tri dekadave të fundit.
UNIONI I GAZETAREVE SHQIPTARE
Tiranë më 17/12/2024
PROPOZIM PËR VLERËSIM TË POETIT, PËRKTHYESIT DHE PUBLICISTIT BUJAR XHAFERAJ ME PENSION TË POSACËM
DREJTUAR : Zotit Edi Rama
Kryeministër i Republikës së Shqipërisë
I nderuar zoti Kryeministër,
Në emër të Unionit të Gazetarëve Shqiptarë, pranoni propozimin tonë për nderimin vlerësues të njerit prej emrave më të spikatur dhe të talentuar të poezisë bashkëkohore shqiptare, të gazetarit dhe publicistit, të intelektualit kurajoz dhe në manifestim të përhershëm të lirisë vetiake në ligjërimin dhe artikulimet publike, zotit Bujar Xhaferaj (Xhaferi).
Shkrimtari Bujar Xhaferi përgjatë gjithë jetës së vet është karakterizuar nga forca e shprehjes së lirë, nga kurajua për kritika të drejtëpërdrejta ndaj akteve dhe subjekteve që cënojnw liritë themelore të individit apo grupeve të ndryshme, në shoqërinë shqiptare.
Aktiviteti jetësor dhe intelektual i Bujar Xhaferit janë shembulli i njeriut të lirë, me zë të përhershëm ndaj drejtësisë dhe për drejtësinë njerëzore e qytetare.
I nderuar zoti Kryeministër!
Bujar Xhaferi është aktualisht shkrimtari dhe gazetari i lirë që ndodhet në të drejtën e vet të përfitimit të një statusi financiar që lehtëson ekzistencën sociale dhe ekonomike të statusit moshor në të cilin prej vitesh ka hyrë. Prej vitesh, kolegu ynë edhe pse themelues i shtypit të lirë postkomunist, është përballur me vështirësi dhe me një realitet të rëndë ekonomik.
Prej dekadash përballet me mungesën e një banese vetiake si dhe pa përkrahje financiare bazike. Në këto kushte, kur ende nuk ka përfituar as pensionin social për arsye burokratike, do t’ju luteshim t’i akordoni Pensionin e Posacëm!
I nderuar zoti Kryeministër,
Me përgjegjësinë e madhe të vlerësimit të figurave që kanë të mishëruar kontribute të cmuara kulturore dhe shkrimore, sikundër është rasti i shkrimtarit dhe gazetarit Bujar Xhaferaj, lutemi ta merrni në konsideratë propozimin tonë!
Me respekt :
UNIONI I GAZETARËVE SHQIPTARË
KRYETARI
Aleksandër Çipa
Leave a Reply