Prokuroria e Posaçme Kundër Korrupsionit dhe Krimit të Organizuar ka vijuar hetimet për një çështje të nisur në vitin 2023 që lidhet me trafik droge, pastrim parash dhe veprimtari kriminale në grup. Në këtë hetim janë përfshirë tre persona, Ervis Ferizaj, Burim Ferizaj dhe Përparim Kallbaj.
Gjykata e Posaçme e Shkallës së Parë për Korrupsionin dhe Krimin e Organizuar, me kërkesë të Prokurorisë së Posaçme ka caktuar masat “sekuestro preventive” për pasuritë e luajtshme dhe të paluajtshme në zotërim direkt dhe indirekt të Ervis Ferizajt dhe Përparim Kalbajt, të akuzuar për trafik droge e pastrim parash.
Sipas SPAK “gjatë hetimeve paraprake janë kryer veprime të mëtejshme hetimore me qëllim verifikimin e pasurive në zotërim të personave nën hetim, verifikimin e burimit të ligjshëm të tyre, si dhe gjetjen dhe sekuestrimin e pasurive që mundet të përbëjnë produkte të veprimtarisë kriminale”.
Konkretisht sipas SPAK është vendosur “sekuestro preventive” për pasuritë e luajtshme dhe të paluajtshme në zotërim direkt dhe indirekt të shtetasit Ervis Ferizaj, të mëposhtme:
“Shoqëria tregtare “Ferizaj-78” sh.p.k, me Nipt M11512017P, me seli në rrugën “Muhamet Gjollesha”, Tiranë, si dhe gjitha asetet e kësaj shoqërie tregtare.
“Pasuria e paluajtshme, nr. 3/8-N6, zona kadastrale 8210, volumi 38, faqe 37, e llojit “Njësi”, me sipërfaqe totale 161.67 m2, në emër të shtetasit E.F. Kjo pasuri është përfituar me kontratën e datës 30.01.2017, me çmimin e vendosur në kontratë prej 200,000 eurosh.
“Pasuria e paluajtshme “Vilë 2 Kate”, nr.169/77, zona kadastrale nr.2375, volumi 16, faqe 119, me sipërfaqe 162.85 m2 truall dhe sipërfaqe totale ndërtimi 140 m2, ndodhur ne Lalëz, Durrës, në emër të E.F. Kjo pasuri është përfituar me kontratën e datës 19.12.2019 me çmimin e vendosur në kontratë prej 80,000 eurosh.
“Shuma monetare prej 77,160 frangash zvicerane”.
Gjithashtu GJKKO ka caktuar masën e sigurimit pasuror “sekuestro preventive” për pasuritë e luajtshme në zotërim indirekt të shtetasit Përparim Kalbaj, të mëposhtme: Shoqëria tregtare “Kalbaj” sh.p.k, me Nipt L91307007H, si dhe gjitha pasuritë e paluajtshme dhe te luajtshme të kësaj shoqërie tregtare.
Gjithashtu, sipas SPAK, “gjatë hetimeve paraprake për këtë procedim penal nga kontrollet e kryera në vendin e ushtrimit të aktiviteteve të shoqërisë “Ferizaj-78” sh.p.k dhe kontrollit të banesave janë gjetur dhe sekuestruar sende dhe shuma monetare me një vlerë totale prej rreth 68,000,000 lekësh të cilat dyshohen se përbëjnë produkte të veprës penale”.
Leave a Reply