Gjermania do të dorëzojë dy sisteme Patriot në Ukrainë

Gjermania njoftoi të premten se do të dorëzojë dy sisteme Patriot në Ukrainë, pas një marrëveshjeje me Shtetet e Bashkuara të Amerikës.

Falë angazhimit të SHBA-së, “Gjermania fillimisht mund të mbështesë Ukrainën me hedhës dhe më pas me përbërës shtesë të sistemit Patriot,” tha ministri gjerman i Mbrojtjes, Boris Pistorius, në një deklaratë, raporton Reuters.

Ushtria gjermane, Bundeswehr, do të dorëzojë fillimisht hedhës shtesë të sistemit Patriot për Ukrainën në ditët në vijim, të cilat më pas do të pasohen nga përbërës të tjerë të sistemit që do të dorëzohen brenda dy ose tre muajve. Në këmbim, Berlini do të marrë sisteme të reja Patriot nga Shtetet e Bashkuara, për të cilat siguron financimin dhe do të dorëzohen me ritëm të përshpejtuar.

Nevojat e Ukrainës për mbrojtje ajrore janë bërë gjithnjë e më urgjente pasi Rusia ka intensifikuar sulmet ajrore në mbarë vendin këtë verë, ndërsa sistemet Patriot kanë dëshmuar se janë efektive në shkatërrimin e raketave balistike ruse.

Gjermania ka dorëzuar tashmë tri sisteme Patriot në Ukrainë dhe deklaroi të premten se dërgimi i sistemeve shtesë nuk do të ndikojë në kontributin e saj ndaj aleancës mbrojtëse të NATO-s.