Kërcënimi i ri iranian dhe Shqipëria

Nga Elton METAJ

Një deklaratë e përbashkët e qeverive të 14 vendeve, mes të cilave edhe Shqipëria, për kërcënimet nga shërbimet inteligjente të Iranit kaloi pa u vënë shumë re në median shqiptare, pak ditë më parë.

Më 31 korrik 2025, krahas vendit tonë, edhe Austria, Belgjika, Kanadaja, Çekia, Danimarka, Finlanda, Holanda, Spanja dhe Suedia shprehën hapur shqetësimin për veprimet armiqësore të Teheranit. Mbi të gjitha kësaj deklarate iu bashkuan edhe tre shtete të rëndësishme për sigurinë europiane dhe globale, si SHBA, Mbretëria e Bashkuar dhe Franca.

Në mënyrë të qartë të 14 qeveritë folën për kërcënime në rritje nga shërbimet inteligjente të ajatollahëve në “territoret tona respektive”. Për më tepër, deklarata demaskon përpjekjet e Teheranit “për të vrarë, rrëmbyer e frikësuar (ngacmuar) njerëz në Europë dhe Amerikën e Veriut, në shkelje të qartë të sovranitetit tonë”.

Të 14 vendet flasin në deklaratën e tyre për rritjen e bashkëpunimit mes shërbimeve sekrete iraniane dhe organizatave kriminale ndërkombëtare, duke synuar e goditur gazetarë, disidentë, qytetarë hebrenj dhe zyrtarë e ish-zyrtarë në #Europë, #SHBA e #Kanada.

Por çfarë i detyroi qeveritë e 14 vendeve të bëhen bashkë për t’i thënë botës se “agjentët syzezinj” kanë shtuar aktivitetin dhe kërcënimet jashtë Iranit, me fokus Europën dhe veriun e Amerikës? Çfarë duhet të kuptojmë më shumë nga ato 3 paragrafë të redaktuar me kujdes? Pse Shqipëria ishte mes vendeve firmëtare?

Së pari, i goditur nga brenda nga #Mossad dhe nga ajri nga bombardimet izraelite e amerikane, #Irani është sot një vend i turpëruar në sferën misterioze të shërbimeve inteligjente. Për këtë arsye, mendjet e errëta në #Teheran mund të jenë duke kërkuar pak lavdi të rikthyer dhe këtë nuk mund ta bëjnë më me raketa. Siç u pa në qershor, në “Luftën e 12 ditëve”, raketat vlejtën shumë pak. Edhe në të shkuarën, më shumë se ushtarakisht, Irani e ka kërcënuar Europën me stimulimin e aktiviteteve e akteve terroriste, përmes shërbimeve të inteligjencës. Ky mund të jetë një rrezik i afërt, për të cilin shërbimet sekrete në Europë e SHBA duken të informuar.

Së dyti, deklarata zbulon një “modus operandi” të ri e të vjetër të shërbimeve iraniane, atë të bashkëpunimit me organizatat kriminale ndërkombëtare, duke “ndriçuar” edhe kategoritë më të rrezikuara nga ky pakt. Një prej tyre, disidentët, ndodhen prej vitesh në Shqipëri. Sigurisht që deklarata nuk jep detaje mbi rreziqe të mundshme ndaj muxhahedinëve iranianë dhe kampit të tyre në Manzë, por inati i Teheranit me çfarë ka mbetur në Kampin “Ashraf 3” nuk duket të jetë shuar.

Së treti, deklarata flet për shkelje sovraniteti të 14 vendeve nga aktiviteti i shërbimeve inteligjente iraniane. “Shkelja e sovranitetit” nuk është një akt i vetëm, as një veprim i tepruar nga shërbime të caktuara, që shkojnë përtej “kufijve të lejuar”. Një klasifikim i tillë i operacioneve iraniane, ku përmenden vrasje e rrëmbime, tregon se gjërat duhet të kenë shkuar shumë thellë. Aq thellë sa shteti organizator dhe opinioni duhen lajmëruar e paralajmëruar publikisht për çfarë po ndodh. Për më tepër që shkeljet e sovranitetit janë shkak i mjaftueshëm për një përgjigje të fortë e të përshtatshme.

Së fundmi, historia ka dëshmuar se, shërbimet inteligjente e mbikëqyrin aktivitetin e njëri-tjetrit dhe veçanërisht të shërbimeve armiqësore. Kjo është “pjesë e lojës”. Por jo çdo herë, shërbimet shkruajnë deklarata për shtyp dhe jo çdo herë 14 qeveri, mes të cilëve shërbimet më të forta inteligjente në botë, bëhen bashkë për të thënë: KUJDES IRANIN JO NË IRAN! Ndaj le të mbetemi të gjithë syçelë, sa kohë “errësira” në Teheran është e thellë.