Ka përfunduar protesta e organizuar nga Organizata e Veteranëve të Luftës së UÇK, Shoqata e të Burgosurve Politikë të Kosovës dhe organizatat e dala nga lufta. Protesta kishte qëllim kundërshtimin e mbajtjes së padrejtë në paraburgim të ish-krerëve të Ushtrisë Çlirimtare të Kosovës në Hagë.
Ish-hetuesja e Tribunalit të Hagës, Nevenka Tromp, në protestën e sotme në Prishtinë, tha se Kosova nuk është kompromis dhe se është shtet sovran. “Sot ne e themi qartë, drejtësia nuk duhet të vonohet, ajo duhet të bëhet pa asnjë vonesë, pa paragjykime dhe për sakrificat e atyre që u ngritën për liri,” tha ajo.
Njëri ndër ish-themeluesit e UÇK-së, Ali Ahmeti, tha se kombi ynë historikisht ka qenë i bashkuar kur i është rrezikuar identiteti dhe dinjiteti. “UÇK-ja është e përmbajtur në ligjet e luftës. Është e përkushtuar për mbrojtjen e komuniteteve nga gjenocidi, qëllimi i UÇK-së ka qenë çlirimtar,” tha ai. Ahmeti vlerësoi se ish-krerët e luftës po mbahen padrejtësisht në Hagë.
Kryetari i OVL-UÇK-së, Hysni Gucati, tha se Gjykata Speciale po tenton të ndryshojë narrativën e luftës së Kosovës. Ai theksoi se veteranët nuk do të lejojnë ndryshimin e historisë. Gucati gjithashtu tha se më veteranët nuk kanë besim në këtë gjykatë.
Leave a Reply