Sekretari i Jashtëm britanik David Lammy do të priti sot (e shtunë) një takim të këshilltarëve të sigurisë kombëtare të aleatëve, ndërkohë që presidenti amerikan Donald Trump po përpiqet të arrijë një marrëveshje paqeje për Ukrainën.
“Downing Street” njoftoi se në takimin në rezidencën zyrtare në Chevening do të marrin pjesë këshilltarë nga SHBA-ja, Evropa dhe Ukraina për të “diskutuar progresin drejt sigurimit të një paqeje të drejtë dhe të qëndrueshme”.
Takimi organizohet me kërkesë të SHBA-së dhe bashkëpritës do të jetë gjithashtu zëvendëspresidenti amerikan JD Vance, i cili po qëndron në Kent për pushime.
Ky zhvillim vjen pas njoftimit të presidentit Trump se ai do të takohet me presidentin rus Vladimir Putin në Alaskë më 15 gusht për të diskutuar rreth përfundimin të luftës në Ukrainë.
Presidenti amerikan kishte sugjeruar më parë se çdo marrëveshje paqeje mund të përfshijë “disa shkëmbime territori,” me raporte që sugjerojnë se Ukraina mund të dorëzojë rajonin e Donetskut.
Por presidenti ukrainas Volodymyr Zelensky ka refuzuar çdo propozim që do të komprometonte integritetin territorial të Ukrainës, duke thënë se Kievi “nuk do t’i japë Rusisë asnjë shpërblim për atë që ka bërë” dhe se “ukrainasit nuk do t’i japin tokën e tyre pushtuesit.”
Kushtetuta e Ukrainës ndalon dorëzimin e territoreve.
Leave a Reply