Shtëpia e Bardhë mund ta ftojë presidentin ukrainas Volodimir Zelenski në Alaska, ku presidenti rus Vladimir Putin dhe ai i SHBA-së Donald Trump do të takohen për të diskutuar përfundimin e luftës Rusi-Ukrainë, tha kanali televiziv “NBC News”.
NBC News, duke cituar një zyrtar të lartë amerikan dhe njerëz të paidentifikuar të informuar mbi diskutimet e brendshme, raportoi se çështja po diskutohet, por nuk ka plane përfundimtare për një vizitë nga presidenti ukrainas, dhe se nëse Zelenski do të jetë në Alaska për takime mbetet e paqartë, por “absolutisht” e mundur.
“Të gjithë shpresojnë shumë që kjo do të ndodhë”, thuhet më tej në lajm, duke cituar zyrtarin e lartë amerikan.
Media amerikane gjithashtu raportoi një zyrtar të lartë të Shtëpisë së Bardhë të ketë thënë se Trump mbetet i hapur për idenë e një takimi trepalësh që përfshin Putinin dhe Zelenskin.
“Tani për tani, Shtëpia e Bardhë po përqendrohet në planifikimin e takimit dypalësh të kërkuar nga presidenti Putin”, ka shtuar zyrtari i lartë i Shtëpisë së Bardhë.
Lajmi vjen ndërsa Trump dhe Putin do të diskutojnë përfundimin e konfliktit të armatosur në Ukrainë gjatë një takimi në Alaskë të premten, në atë që do të jetë takimi i parë ballë për ballë midis presidentëve Rusi-SHBA në detyrë që nga qershori 2021, kur Putin u takua me presidentin e atëhershëm amerikan Joe Biden në Gjenevë të Zvicrës.
Leave a Reply