Mesazhi i Shefit të Shtabit të Ushtrisë me rastin e riemërimit në detyrë:
Të nderuar anëtarë të Forcave të Armatosura!
Është një nder për mua që më është besuar sërish detyra e Shefit të Shtabit të Forcave të Armatosura të Republikës së Shqipërisë.
Shpreh mirënjohjen time të veçantë ndaj Ministrit të Mbrojtjes, z. Pirro Vengu, Kryeministrit të Republikës së Shqipërisë, SH.T.Z. Edi Rama, si dhe Presidentit të Republikës, SH.T.Z. Bajram Begaj, për mbështetjen dhe besimin që më është dhënë.
Premtoj të vazhdoj me vendosmëri punën për transformimin e Forcave të Armatosura në një institucion të fuqishëm, profesional dhe të gatshëm për të përmbushur detyrat kombëtare dhe ato të angazhimeve ndërkombëtare, me synim ruajtjen e respektit dhe dinjitetit për çdo anëtar të Forcave të Armatosura.
Të nderuar ushtarakë,
Me respektin dhe mirënjohjen më të thellë, dëshiroj të shpreh falënderimet e mia për përkushtimin, profesionalizmin dhe sakrificat që ju tregoni çdo ditë në shërbim të atdheut.
Puna juaj e palodhur, gatishmëria për të përmbushur detyrat dhe vendosmëria për të mbrojtur sigurinë kombëtare janë shembull frymëzues për të gjithë qytetarët.
Ju falënderoj për besnikërinë ndaj misionit dhe për mbajtjen e lartë të vlerave të uniformës. Bashkë, me disiplinë dhe unitet, do të vazhdojmë të forcojmë aftësitë tona dhe të sigurojmë të ardhmen e sigurt të vendit tonë.
Forcat e Armatosura do të vazhdojnë të zhvillohen dhe të integrohen në mënyrë të qëndrueshme, duke garantuar realizimin profesional të detyrave dhe kontributin tonë për paqen dhe sigurinë, përmes angazhimit në misione dhe operacione në kuadër të Aleancës së NATO-s, Bashkimit Evropian, Kombeve të Bashkuara dhe iniciativave rajonale.
Dua të siguroj aleatët tanë strategjikë dhe partnerët ndërkombëtarë se bashkëpunimi, si në kuadër të Aleancës së NATO-s, ashtu edhe përmes marrëveshjeve dypalëshe, do të mbajë një rol kyç në zhvillimin dhe zbatimin e angazhimeve tona ushtarake dhe gjeostrategjike.
Së bashku, shpreh bindjen e thellë se do ta realizojmë me sukses misionin tonë ndaj Atdheut!
Me respekt,
Gjenerallejtnant Arben Kingji
Leave a Reply