Trump: Hamasi nuk mund të qëndrojë në Gaza

Presidenti i SHBA-së, Donald Trump tha se Izraeli duhet të vendosë për hapin e tij të ardhshëm, por theksoi se Hamasi nuk mund të qëndrojë në Gaza.

Duke folur në telefon me agjencinë e lajmeve “Axios” lidhur me sulmet e Izraelit ndaj Gazës, Trump nuk deklaroi shprehimisht se do të mbështeste vendimin e kryeministrit izraelit, Benjamin Netanjahu për të pushtuar Gazën. Megjithatë, ai tha se nuk besonte se Hamasi do t’i lironte pengjet në rrethanat aktuale.

Trump tha se Izraeli duhet të vendosë se çfarë të bëjë më pas dhe gjithashtu nëse do ta lejojë Hamasin të qëndrojë në Gaza, por, sipas tij, “Hamasi nuk mund të qëndrojë atje”, raportoi “Axios”.

Netanjahu pretendon se “ushtria e tij do ta pushtojë qytetin e Gazës shumë shpejt”, duke shtuar se “dëshiron administratë civile në enklavën palestineze”.

“Ne kemi bërë një marrëveshje të shkëlqyer. Kemi rreth 70 deri në 75 për qind të Gazës nën kontrollin izraelit, por kemi dy fortesa të mbetura”, tha ai duke aluduar në qytetin e Gazës dhe kampet qendrore në Al-Mawasi në Gazën jugore.