Trump do të presë Putinin në një bazë ushtarake amerikane

Presidenti i Rusisë, Vladimir Putin, do të pritet të premten në Alaska në një bazë ushtarake amerikane për të takuar shefin e Shtëpisë së Bardhë, Donald Trump. Takimi i shumëpritur Trump-Putin, me fokus te Ukraina, do të zhvillohet në Ankorazh (Anchorage), qyteti më i madh i Alaskës, por jo kryeqyteti i shtetit.

Megjithatë nuk do të jetë qyteti që do të presë dy liderët dhe as ndonjë ndonjë ndërtesë civile (hotel, etj). Ata do të takohen mes tyre në Bazën e Bashkuar “Elmendorf-Richardson”. Baza është e vendosur në jug të pjesës qendrore të Alaskës, mes një pamjeje piktoreske, mes maleve ku dëbora nuk largohet gjatë gjithë vitit, liqeneve të ngrirë dhe lumenjve.

Baza e Bashkuar “Elmendorf-Richardson” është vlerësuar se plotëson kërkesat e stafeve të të dy presidentëve lidhur me sigurinë dhe aspekte të tjera shoqëruese të një takimi të nivelit të lartë.

Kjo bazë ka rreth 5.550 njerëz si personel të saj dhe vlerësohet si tejet strategjike për ushtrinë amerikane për shkak të pozicionit të saj në Alaska. Ajo ka nisur të ndërtohet në vitin 1940 për nevojat e ushtrisë amerikane dhe në vitin 2010 ka marrë statusin e një baze të bashkuar.

Trump do të udhëtojë për rreth 8 orë nga Baza Endrju (Joint Base Andrews), në Meriland, pranë Uashington DC, deri në aeroportin e #Anchorage. Putin do të udhëtojë për rreth 9 orë nga #Moska deri në vendtakimin me Presidentin amerikan.

Variantet për takimin

Zgjedhja e vendit të takimit, pasi Trump dhe Putin ranë dakord të bisedojnë, ka qenë një vendim jo i lehtë për shkak të kufizimeve që lidhen me zhvendosjen fizike të shefit të Kremlinit. Nga harta e mundshme e takimit janë përjashtuar vendet ku është në fuqi urdhri i Gjykatës Ndërkombëtare për arrestimin e Putinit. As SHBA dhe as Rusia nuk e njohin autoritetin e kësaj gjykate.

Alternativa e Emirateve të Bashkuara Arabe, e preferuar nga Putin, nuk është pranuar nga Uashingtoni për shkak të largësisë dhe zonës ende të nxehtë në Lindjen e Mesme. Gjithashtu, një ndër variantet e trajtuara ka qenë Hungaria e kryeministrit Orban, miqësor si me Trump, edhe me Putin.

Megjithatë, sipas shtypit, gatishmëria e Putinit për të shkelur në territorin amerikan ka habitur jo pak stafin e Presidentit Trump. Për më tepër, Putin, jo vetëm do të pritet në tokën amerikane, por në një bazë ushtarake të saj.