Presidenti i SHBA-së, Donald Trump, ka thirrur të hënën për një takim (18 gusht) në Shtëpinë e Bardhë, Presidentin ukrainas, Volodimir Zelenski, ndërsa do të synojë organizimin e një takimi trepalësh SHBA-Rusi-Ukrainë më 22 gusht.
Burime të shtypit ndërkombëtar bëjnë të ditur se të premten e ardhshme, nëse të gjithë palët do të jenë dakord, mund të ketë një takim Trump-Putin-Zelenski. Ky është afati i përcaktuar nga administrata amerikane.
Pas takimit Trump-Putin në Alaska, Presidenti ukrainas e ka dhënë miratimin e tij për një takim trepalësh. Ende nuk ka një qëndrim publik për këtë nga Rusia.
Gjithashtu, disa liderë europianë mësohet se janë ftuar në Shtëpinë e Bardhë të hënën për të qenë të pranishëm në takimin Trump-Zelenski. Ende nuk ka një listë zyrtare të të ftuarve për bisedime në Uashington.
Qëndrimi i SHBA
Vetë Trump pranoi se ka hequr dorë nga qëllimi i armëpushimit të menjëhershëm në Ukrainë , përpara bisedimeve me Zelenskin në SHBA. Pas përfundimit të samitit me presidentin rus Vladimir Putin në Alaskë, presidenti amerikan informoi presidentin Zelenski dhe udhëheqësit evropianë rreth diskutimeve.
“Një ditë e shkëlqyer dhe shumë e suksesshme në Alaskë! Takimi me presidentin e Rusisë, Vladimir Putin shkoi shumë mirë, si dhe një telefonatë në mbrëmje vonë – me presidentin e Ukrainës, Volodimir Zelenski dhe udhëheqës të ndryshëm evropianë, përfshirë sekretarin e përgjithshëm – shumë të respektuar – të NATO-s, Mark Rutte”, tha Trump.
“U vendos nga të gjithë, se mënyra më e mirë për t’i dhënë fund luftës së tmerrshme – midis Rusisë dhe Ukrainës – është të shkohet drejtpërdrejt në një Marrëveshje Paqeje – e cila do t’i jepte fund luftës, dhe jo thjesht një Marrëveshje Armëpushimi, e cila shpesh herë nuk është e qëndrueshme”, theksoi presidenti amerikan në “Truth Social”.
“Presidenti Zelenski do të vijë në Uashington, në Zyrën Ovale, të hënën pasdite. Nëse gjithçka shkon mirë, atëherë do të caktojmë një takim edhe me presidentin Putin”, tha Trump.
Qëndrimi i Ukrainës
Gjithashtu, Zelenski tha sot në mëngjes se po shkonte në Uashington për të diskutuar të gjitha detajet në lidhje me përfundimin e luftës.
“Të hënën do të takohem me presidentin Trump në Uashington, për të diskutuar të gjitha detajet në lidhje me përfundimin e luftës. Jam mirënjohës për ftesën”, tha Zelenski.
Ai tha se mbështet propozimin e Trump për një takim tripalësh me presidentin rus Vladimir Putin.
Qëndrimi i Rusisë
Presidenti rus, Vladimir Putin, ka mbledhur drejtuesit e lartë shtetërorë për t’i informuar për rezultatet e negaciatave ruso-amerikane në #Alaska me Presidentin amerikan, Donald Trump. Shefi i Kremlinit shprehu kënaqësinë e tij për rezultatet e takimit, duke folur për zgjidhje të shkaqeve që shkaktuan krizën në Ukrainë.
“Kemi biseduar për të gjitha fushat, por para së gjithash, kemi biseduar mbi mundësinë e zgjidhjes së krizës ukrainase në mënyrë të ndershme. Kemi patur mundësinë të flasim për gjenezën dhe shkaqet e krizës. Eliminimi i atyre rrënjëve të krizës duhet të jetë baza për zgjidhjen”, u shpreh Presidenti rus.
Sipas kreut të Kremlinit, bisedimet na dërgojnë më pranë vendimeve të nevojshme. Ai shtoi se respektonte qëndrimin amerikan për një ndalim të luftës në Ukrainë.
Leave a Reply