Ukraina ka premtuar se do të blejë rreth 100 miliardë dollarë armatime nga Shtetet e Bashkuara për të siguruar mbështetjen e administratës “Trump” për garancitë e sigurisë në rast të një marrëveshjeje paqeje me Rusinë. Sipas një dokumenti, të cilit i referohet “Financial Times”, armatimi do të blihet nga Kievi me financim europian, por nuk është e vetmja marrëveshje e kërkuar mes Ukrainës dhe SHBA.
Gjithashtu, Ukraina ka ofruar që Kievi dhe Uashingtoni të firmosin një marrëveshje me vlerë 50 miliardë dollarë për të prodhuar dronë me kompanitë ukrainase, të cilat kanë eksperimentuar teknologjinë prej nisjes së agresionit rus në shkurt 2022. Të angazhuar në fushën e betejës prej mbi 3 vjetësh, ukrainasit kanë realizuar disa operacione spektakolare me dronë kundër forcave ruse.
Dokumenti me vlerë 100 miliardë dollarë nuk detajon se cfarë lloje armësh do të blihen nga Ukraina. Megjithatë Kievi nuk e ka fshehur dëshirën e tij për të blerë të paktën 10 sisteme të mbrojtjes ajrore “Patriot”, prodhim amerikan, për të mbrojtur qytetet dhe infrastrukturën kritike. Në listë e nevojave dhe dëshirave të Ukrainës janë edhe raketa të llojeve të ndryshme dhe pajisje të tjera ushtarake.
Megjithatë dokumenti nuk ka detaje për mënyrën se si do të realizohen blerjet apo si do të bashkëpunohet për prodhimin e dronëve, një element me shumë rëndësi në angazhimet ushtarake në Ukrainë apo edhe në konfliktet në Azerbajxhan-Armeni apo Izrael-Iran.
Pavarësisht nëse do të realizohet ose jo, oferta ukrainase kërkon të tërheqë vëmendjen e Presidentit Trump për përfitimet që do të ketë industrisë ushtarake dhe jo vetëm e Shteteve të Bashkuara.
Nga ana e saj, administrata “Trump” ka qartësuar se nuk do të dhurojë më furnizime ushtarake për Kievin, por ato do të blihen, me financim të vendeve europiane. Për këtë është arritur edhe një marrëveshje me angazhimin e NATO-s.
Në këmbim të ofertës 100 miliardë dollarëshe për Uashingtonin, Ukraina pret që SHBA të jenë pjesë aktive e një Sistemit të Garancive që do të ketë një marrëveshje paqeje me Moskën për të frenuar tentativa pushtuese në të ardhmen.
Leave a Reply