Dëshmitarët që do të mbrojnë Thaçin, mes tyre edhe Ollbrajt

Në konferencën përgatitore për mbrojtjen në rastin “Thaçi dhe të tjerët”, avokati i ish-presidentit Hashim Thaçi, Pierre-Richarf Prosper, tha se një listë e gjerë e dëshmitarëve do të përdoren në procesin e mbrojtjes në Dhomat e Specializuara në Hagë.

Duke marrë parasysh që në këtë fazë të procesit, dëshmitë mund të pranohen edhe në formë të shkruar, Prosper bëri të ditur se ish-sekretarja amerikane e Shtetit, Madeleine Ollbrajt, diplomati Richard Holbrooke dhe senatori Bob Dole, janë në mesin e figurave ndërkombëtare, dëshmitë e deklaratat e të cilëve gjatë viteve do të kërkohet të vlerësohen në gjyq. Ai tha se informacioni është shfajësues e që lidhet drejtpërdrejt me lëndën e prokurorisë.

Përveç kësaj, gjatë konferencës përgatitore të mbajtur në Dhomat e Specializuara të Kosovës (DhSK) në Hagë, ekipi mbrojtës i Hashim Thaçit, i përfaqësuar nga avokati Luka Mishetiq, bëri të ditur se synojnë të përmbyllin paraqitjen e dëshmitarëve të tyre deri në fund të muajit nëntor.Ndërkohë, mbrojtja e Jakup Krasniqit, e përfaqësuar nga avokati Aiden Ellis, deklaroi se për paraqitjen e provave të tyre u nevojitet një javë, pa llogaritur kohën për kundërpyetje.

Ai shtoi se është ende e paqartë se kur do të përfundojë paraqitja e provave nga ana e mbrojtjes së Krasniqit, pasi kjo do të varet nga përfundimi i paraqitjes së provave nga mbrojtja e Hashim Thaçit.