Shtetet e Bashkuara të Amerikës kanë sanksionuar gjyqtarin francez Nicolas Yann Guillou, i cili ishte gjyqtar i procedurës paraprake në rastin e ish-Presidentit Hashim Thaçi, e që aktualisht shërben në Divizionin e Gjykimeve në Gjykatën Ndërkombëtare Penale (ICC).
Shtetet e Bashkuara kanë vendosur sot (e mërkurë) sanksione ndaj katër individëve që aktualisht shërbejnë në Gjykatën Ndërkombëtare Penale (ICC). Vendimi i Departamentit të Shtetit bazohet në Urdhrin Ekzekutiv 14203 dhe ka për qëllim të ndëshkojë ata që angazhohen në veprime të ICC-së kundër SHBA-së dhe Izraelit.
Personat e sanksionuar janë:
Kimberly Prost, gjyqtare e divizionit të gjykimit të ICC-së
Nicolas Yann Guillou, gjyqtar i divizionit të gjykimit të ICC-së
Nazhat Shameem Khan, zëvendës prokurore e ICC-së
Mame Mandiaye Niang, zëvendës prokurore e ICC-së
“Prost është sanksionuar për autorizimin e hetimit të ICC-së mbi personelin amerikan në Afganistan. Guillou për autorizimin e urdhër-arresteve për Kryeministrin izraelit Benjamin Netanyahu dhe ish-Ministrin e Mbrojtjes Yoav Gallant. Zëvendës prokuroret Shameem Khan dhe Niang janë sanksionuar për mbështetje të vazhdueshme të veprimeve të ICC-së kundër Izraelit”, thuhet në njoftimin zyrtar.
Departamenti i Shtetit ben të ditur se si pasojë e sanksioneve, e gjithë prona dhe interesat në pronë të personave të sanksionuar që ndodhen në SHBA ose që janë nën kontroll të shtetasve amerikanë janë të bllokuara. Gjithashtu, ndalohet çdo transaksion me këta individë nga persona ose kompani amerikane, përveç nëse autorizohet nga OFAC.
Leave a Reply