Monika Maxhioni (Monica Maggioni), gazetarja e njohur italiane, ka lënë angazhimin e saj si drejtuese në #Rai (Radio Televizionin Italian) pas 33 vitesh, duke preferuar të fokusohet në dy emisione të saj, ku është drejtuese.
Maxhioni nuk do të jetë më punonjëse e televizionit publik, ku hyri me konkurs më tepër se tre dekada më parë. Ajo do të ketë një kontratë bashkëpunimi me televizionin si bashkëpunëtore e jashtme dhe do të vazhdojë të drejtojë programet e saj “In mezz’ora” (Në gjysmë ore) dhe “Newsroom” (Dhoma e lajmeve).
Një kontratë të ngjashme me “Rai”-n ka edhe gazetari i njohur, Bruno Vespa, drejtues i emisioneve “Porta a Porta” (Portë më portë) dhe “Cinque Minuti” (Pesë minuta).
Gjatë karrierës së saj, Maxhioni ka qenë drejtuese e #rainews, drejtuesja e parë grua e #TG1 (revistës televizive) dhe presidente e “Rai”-t nga gushti 2015 deri në korrik 2018.
Nga viti 2023, ajo ka qenë drejtuese editoriale për ofertën informative, duke përfituar një pagë vjetore prej rreth 240 mijë euro (20 mijë euro në muaj).
Leave a Reply