Norvegjia do t’i ofrojë Gjermanisë një mbështetje financiare me vlerë 590 milionë euro për furnizimin e përbashkët të dy sistemeve raketore “Patriot” dhe të raketave për Ukrainën, njoftoi sot qeveria norvegjeze.
Norvegjia do të kontribuojë gjithashtu në blerjen e sistemeve të radarëve kundërajrorë të prodhuara nga kompania gjermane “Hensoldt” dhe sistemeve kundërajrorë të prodhuara nga kompania norvegjeze “Kongsberg”.
“Së bashku me Gjermaninë, po sigurohemi që Ukraina të marrë sisteme të fuqishme të mbrojtjes ajrore. Gjermania dhe Norvegjia po punojnë së bashku për të mbështetur Ukrainën në luftën e saj për të mbrojtur vendin dhe për të mbrojtur popullsinë civile nga sulmet ajrore ruse”, shkroi kryeministri Jonas Gahr Store.
Në korrik, kancelari gjerman Friedrich Merz dhe Store ranë dakord në një takim në Berlin – për të financuar së bashku forcimin e mbrojtjes ajrore të Ukrainës.
Në fillim të gushtit, qeveria gjermane tha se dorëzimi i sistemeve “Patriot” mund të fillonte pasi prodhuesit amerikanë ranë dakord të furnizonin zëvendësime sa më shpejt të ishte e mundur, në mënyrë që Gjermania të përmbushte angazhimet e saj ndaj NATO-s.
Plani fillestar kishte qenë të porositeshin dy sisteme “Patriot” direkt nga Shtetet e Bashkuara të Amerikës – për t’ia dorëzuar Ukrainës – me një kosto prej rreth 1 miliard eurosh secili.
Leave a Reply