Karteli i Sinaloas, “El Mayo” pranon fajësinë, mbetet në burg përjetë

Ismael Zambada Garcia, i njohur si “El Mayo”, 75 vjeç, nga #Sinaloa e Meksikës, pranoi sot fajësinë, në marrëveshje me Byronë Federale të Hetimit #FBI, se ka qenë një drejtues kryesor i Kartelit të Sinaloas, një sipërmarrje kriminale shumëvjeçare dhe ndër organizatat më të dhunshme të trafikut të drogës në botë

Prokurorja e Përgjithshme e SHBA, Pamela Bondi, tha se ky terrorist i huaj ka kryer krime të tmerrshme kundër popullit amerikan dhe do të paguajë për këto krime, duke e kaluar pjesën e mbetur të jetës pas hekurave në një burg amerikan.

Drejtori i FBI, Kash Patel, e cilësoi ditën e sotme si një moment krenarie për FBI-në dhe partnerët e saj.

Ismael Zambada Garcia “El Mayo” dhe “El Chapo” Guzman ishin bashkëthemeluesit e Kartelit të Sinaloas, duke fituar miliarda dollarë nga tregtimi i kokainës, heroinës dhe fentanilit, nga janari 1989 deri në janar 2024. Krahas trafikut të drogës, “El Mayo” akuzohet nga drejtësia amerikane, në disa shtete, edhe për pastrim parash dhe vrasje.

I arrestuar në korrik 2024, Zambada Garcia do të përballet me gjykatën më 13 janar 2026, që do të vendosë nëse e pranon marrëveshjen e arritur. Megjithatë, ai do të ketë si dënim minimal burgimin e përjetshëm për drejtim të organizatës kriminale.