Forumi Strategjik i Bledit në Slloveni, një platformë globale për shkëmbimin e ideve dhe këndvështrimeve për zhvillime aktuale dhe të së ardhmes, do të zhvillohet më 1-2 shtator, në takimin e tij të përvitshëm, Me qëllimin për të ofruar qasje strategjike dhe zgjidhje për sfidat, Forumi mbledh çdo vit liderë politik, drejtues shtetesh e qeverish, përfaqësues të organizatave ndërkombëtare, biznesit e medias për diskutime të përbashkëta.
Takimi i fillimshtatorit do të ketë si qendër të diskutimeve reflektimet dhe diskutimet për krizat e vazhdueshme dhe paqartësinë gjeopolitike. Në kuadrin e një rendi botëror të cënuar për shkak të konflikteve në Ukrainë e Gaza, liderët politikë dhe ekspertët do të flasin për rolin e Europës në një të ardhme më bashkëpunuese dhe më të qëndrueshme.
Në konferencë do të marrin pjesë, krahas Presidentes së Sllovenisë, Natasha Pirc Musar, edhe Presidenti i Estonisë, Alar Karis, Presidenti i Cekisë, Petr Pavel dhe Presidenti i Malit të Zi, Jakov Milatovic. Ndër krerët e qeverive që do të udhëheqin delegacionet, krahas sllovenit Robert Golob, në Bled do të jetë Kryeministri kroat, Andrej Plenkoviç dhe ai i Malit të Zi, Milojko Spasiç.
Gjithashtu, Kryeministri i Shqipërisë, Edi Rama, është konfirmuar mes pjesëmarrësve. Ai do të jetë pjesë e panelit në ditën e parë të forumit (1 shtator), nga ora 14:00-15:30, ku fjala kryesore do të jetë e Presidentit të KE, Antonio Kosta.
Në konferencë do të jenë gjithashtu të pranishëm një numër i madh shefash të diplomacisë nga Egjipti, Jordania, Siria, Sllovakia, Letonia, Lituania, Kosova, Selia e Shenjtë, Bosnje-Hercegovina dhe Maqedonia e Veriut. Përfaqësues qeveritarë do të ketë edhe nga Ukraina, Turqia, Katari, Greqia, Tajlanda, Turkmekistani, etj.
Ndër organizmat ndërkombëtare, në panelet e Forumit të Bledit do të marrë pjesë edhe Presidenti i Këshillit Europian, Antonio Kosta dhe drejtuesi i Agjencisë së Energjisë Atomike, Rafaele Grosi.
Leave a Reply