Nënkryetarja e Kuvendit të Kosovës, Albulena Haxhiu, pas përmbylljes së seancës konstituive, tha se pas shumë vitesh ishte mundësia që të votohej një deputet nga komuniteti serb, që njeh Republikën e Kosovës, por kjo alternativë nuk u shfrytëzua dhe do të dilte jashtë kontrollit dhe ndikimit të Listës Serbe.
Sipas saj, ky ishte momenti vendimtar, sepse lojaliteti ndaj Republikës së Kosovës është baza për pjesëmarrje politike.
“Është e papranueshme që një subjekt politik që nuk e njeh shtetin tonë dhe që punon sistematikisht kundër interesave të Republikës së Kosovës dhe të qytetarëve tanë, nuk mund të pretendojë dhe as të ketë rol vendimtar në proceset demokratike që vet i mohon,” tha Haxhiu.
Ajo shtoi se Lista Serbe i referohet Kuvendit të Kosovës si “Kuvend i Prishtinës”, pra një fyerje e hapur ndaj sovranitetit dhe Kushtetutës së Kosovës.
“Një formacion politik me ideologji të tillë, që sfidon hapur Kushtetutën dhe rregullat e sistemit demokratik, nuk mund të ketë autoritet, as të bllokojë proceset institucionale, dhe as të pengojë jetën politike në vend,” tha Haxhiu.
Ajo deklaroi se Vetëvendodje është e interesuar të ecë përpara “ose me qeverinë e re, ose me zgjedhje”.
“Ne nuk guzojmë që të mbesim peng i atyre që mohojnë ekzistencën tonë si shtet. Ne jemi të interesuar të ecim përpara, ose me qeverinë e re ose me zgjedhje”, theksoi Haxhiu.
Deputeti tjetër i VV-së, Hekuran Murati, ka deklaruar se mbetet vetëm një alternativë, të vazhdohet me krijimin e Qeverisë ose vendi të shkojë në zgjedhje.
“Nuk ka më rrugë tjetër. Nënkryetarët janë zgjedhur, krejt çka ka mbetur është një alternativë se si të procedohet tutje pa një nënkryetar, që është një nga gjashtë, ose vendi të shkojë në zgjedhje. Pra, ne jemi të gatshëm të vazhdojmë me krijimin e Qeverisë kështu siç është dhe të vazhdojmë institucionet. Ose të kthehemi në zgjedhje, që s’do ta dëshironim,” tha Murati.
Leave a Reply