Xhan Marko Kioçi (Gian Marco Chiocci), drejtuesi aktual i TG1 – Revistës Televizive të RAI1 (kanali kryesor i Radio Televizionit publik Italian) është ftuar të jetë zëdhënës i kryeministres Xhorxhia Meloni.
Ftesa, që duket se ka lidhje me përgatitjet dhe planet e politikanes 48-vjeçare për zgjedhjet e ardhshme politike të vitit 2027, ka shkaktuar debate politike lidhur me pavarësinë e medias publike.
Vetë #Chiocci, duke mos e mohuar kërkesën e kryeministres dhe lideres së “Fratelli d”Italia” (“Vëllezër të Italisë”, grupim politik i së djathtës), ka deklaruar se ende nuk ka asgjë konkrete për propozimin dhe se redaksia e #TG1 do të informohej e para.
Gian Marco Chiocci, 61 vjeç, është një gazetar me eksperiencë, që drejton prej dy vitesh redaksinë më të rëndësishme informative të #Rai-t. Gjatë karrierës së tij në shumë redaksi dhe organe të medias, Chiocci njihet për disa intervista të rralla dhe investigime gazetareske. Dy vjet më parë, ai bëri bujë me intervistat ekskluzive me Papa Françeskun për luftërat në Gaza e Ukrainë dhe zhvillimet brenda kishës, si dhe me ministrin e atëhershëm të Kulturës, Sangiuliano, i përfshirë në një skandal që e shtyu drejt dorëheqjes.
Leave a Reply