Presidenti Vladimir Putin duket se ka siguruar një fitore diplomatike që e ka kërkuar prej vitesh, me një marrëveshje të madhe për ndërtimin e një gazsjellësi që do të lidhë Rusinë dhe Kinën për dekada dhe që mund të riformësojë tregtinë globale të gazit,sipas “Bloomberg”.
Kreu i kompanisë ruse ”Gazprom PJSC”, duke folur për median ruse në Pekin, tha se gjiganti i gazit ka nënshkruar një marrëveshje juridikisht detyruese për ndërtimin e gazsjellësit të shumëpritur ”Power of Siberia 2” për në Kinë përmes Mongolisë.
Edhe pse Pekini nuk ka konfirmuar ende detaje të marrëveshjes, çdo përparim në projekt përbën një fitore diplomatike për Putinin, teksa Moska përballet me efektet e sanksioneve perëndimore.
Njoftimi erdhi teksa lideri kinez Xi Jinping dhe Putin ndanë momente miqësore në Pekin.
Marrëveshja e Pekinit për të blerë më shumë gaz rus shihet edhe si një kundërpërgjigje ndaj SHBA-së, pasi Trump pak ditë më parë vendosi taksa prej 50% ndaj mallrave indiane për shkak të blerjeve të naftës ruse nga India.
Ngrohja e marrëdhënieve Pekin–Moskë ka sjellë përfitime për të dyja palët, teksa ekonomia ruse vuan nën sanksionet perëndimore për luftën në Ukrainë. Tregtia dypalëshe arriti një rekord prej 245 miliardë dollarësh në vitin 2024, një rritje me 68% krahasuar me vitin 2021, sipas të dhënave doganore kineze.
Duke folur për agjencitë ruse nga Pekini, drejtori ekzekutiv i ”Gazprom”-it, Alexey Miller, tha ”se kompania mund të furnizojë deri në 50 miliardë metra kub në vit për 30 vjet përmes ‘Power of Siberia 2”.
Megjithatë, Kina nuk ka dhënë ende detaje. Agjencia shtetërore kineze e lajmeve, Hsinhua raportoi për më shumë se 20 marrëveshje bashkëpunimi në fusha të ndryshme, përfshirë energjinë, por nuk përmendi specifikisht gazsjellësin.
”Gazprom” ka nevojë për tregun aziatik për të zëvendësuar humbjen e tregut evropian, ku dikur shiste deri në 150 miliardë metra kub në vit.
Aktualisht, kompania eksporton vetëm rreth një të dhjetën e asaj sasie, kryesisht drejt vendeve si Hungaria dhe Sllovakia.
Putin ndodhet në Pekin për paradën e madhe ushtarake që shënon 80-vjetorin e përfundimit të Luftës së Dytë Botërore.
Leave a Reply