EKSKLUZIVE – Shqipëria, kontribut për Garancitë e Sigurisë së Ukrainës

Shqipëria i është bashkuar sot tryezës së Koalicionit të të Vullnetshmëve, një grup mbi 30 shtetesh i bërë bashkë për të ndihmuar Ukrainën.

Bërthama e takimit ka qenë në Pallatin “Elize” në Paris, nën drejtimin e përbashkët të Presidentëve të Francës dhe Ukrainës, përkatësisht Emanuel Makron dhe Volodimir Zelenski. Në #Paris ndodhej edhe i dërguari i posaçëm amerikan, Steve Witkoff, krahas drejtuesve të Bashkimit Europian dhe disa presidentëve e kryeministrave.

Ashtu si pjesa më e madhe e krerëve të shteteve e qeverive të vendeve të Koalicionit të të Vullnetshmëve, edhe Kryeministri i Shqipërisë, Edi Rama, ka marrë pjesë në takim në lidhje video nga #Tirana.

Koalicioni i të Vullnetshmëve është platforma kryesore e diskutimit të paketës së Garancive të Sigurisë për Ukrainën për të garantuar një paqe të besueshme dhe afatgjatë.

Takimi i sotëm në Paris ka diskutuar gatishmërinë e secilit vend për të kontribuar për sigurinë e Ukrainës nga toka, ajri, deti dhe hapësira kibernetike.