Nuk ka ende një vend dhe sigurisht një datë për takimin e premtuar mes presidentëve të Rusisë dhe Ukrainës për të diskutuar dhënien fund të luftës. Megjithë ndërmjetësimin amerikan, palët nuk po bien dakord për kohën dhe vendin e takimit, ndërsa Presidenti rus e ftoi homologun ukrainas në Moskë. Nga ana tjetër, Zelenski ka përmendur si vend të mundshëm të takimit Turqinë, duke mos përjashtuar mundësinë edhe për shtete të tjera.
Ukraina tha se është gati për negociata në nivel udhëheqësish në çdo format, por veprimet e Kremlinit tregojnë mungesë dëshire për dialog të vërtetë dhe fund të luftës. Deklaroi u bë nga presidenti ukrainas, Volodimir Zelenski gjatë një konference për shtyp në Paris.
“Një takim me Putinin është i nevojshëm. Kjo nuk është çështje dëshire, por domosdoshmërie. Ne e mbështesim këtë takim në çdo format trepalësh ose dypalësh”, theksoi Zelenski.
Në të njëjtën kohë, ai tha se Rusia po bën gjithçka që mundet për të shtyrë takimin.
“Partnerët tanë amerikanë na kanë informuar se Putini më ka ftuar në Moskë. Duket se ata duan që takimi të mos zhvillohet, prandaj po më ftojnë. Rusia ka filluar të flasë për takimin, gjë që nuk është keq, por deri më tani nuk e shohim dëshirën e tyre për t’i dhënë fund luftës”, theksoi kreu i shtetit.
Leave a Reply