Trump ndryshon emrin e Departamentit të Mbrojtjes në “Departamenti i Luftës”

Presidenti i SHBA-së, Donald Trump, me qëllimin për t’i dhënë imazh më të ashpër ushtrisë, firmosi një dekret presidencial për të ndryshuar emrin e Departamentit të Mbrojtjes (Pentagonit) në “Departamenti i Luftës”.

Sipas ligjit amerikan, Trump nuk mund ta ndryshojë emrin e Departamentit të Mbrojtjes pa legjislacionin e miratuar nga Kongresi. Për këtë arsye me dekretin presidencial që Trump nënshkroi, pritet të fillojnë të gjitha procedurat përkatëse lidhur me ndryshimin e emrit të departamentit në “Departamenti i Luftës” dhe që Pentagoni të bëjë përgatitjet e nevojshme.

Departamenti i Luftës u krijua në vitin 1789, vitin kur u miratua Kushtetuta e SHBA-së. Emri i tij u ndryshua në Departamenti i Mbrojtjes me një ligj të miratuar në vitin 1947, dy vjet pas përfundimit të Luftës së Dytë Botërore.