Shqipëria, shumëfishim i investimeve në mbrojtje

Ministri i Mbrojtjes, Pirro Vengu mori pjesë sot (e mërkurë) në panelin “Shqipëria në sigurinë rajonale dhe globale”, në konferencën “Diplo 2025”.

Përpara ambasadorëve shqiptarë në botë, Vengu foli rreth industrisë ushtarake, për modernizimin e kapaciteteve të luftimit, kërcënimet dhe përgjegjësitë e reja që paraqiten si një dimension i ri për diplomacinë shqiptare dhe rolin e vendit tonë si faktor sigurie në Evropën Juglindore.

Vengu theksoi se, “anëtarësimi në NATO dhe procesi i anëtarësimit në Bashkimin Evropian ka ndryshuar mënyrën sesi planifikojmë, mënyrën sesi zbatojmë, mënyrën sesi ndërveprojmë me forcat aleate”.

Vengu u shpreh se, në 10 vitet e fundit ka një 10-fishim të investimeve në mbrojtje.

“Kemi rrogat më të larta në rajon për ushtarakët tanë. Kemi një ndërveprim më të madh, shumë më shumë forca të angazhuara në misione, qoftë të BE-së, qoftë edhe të NATO-s dhe patjetër kjo ka ardhur edhe me një rritje të reputacionit tonë sa i përket influencës në rajon, besueshmërisë në rrafshin operacional, por edhe në rrafshin e inteligjencës ushtarake”, tha ai.

“Kemi si refren linjëzimin 100% me politikën e Bashkimit Evropian dhe të sigurisë”, tha Vengu duke e ilustruar me shembullin e se, “nga 500 ushtarakë shqiptarë që janë në misione jashtë vendit sot në mënyrë gati permanente 2/3-a janë në misione që kanë të bëjnë me Evropën Juglindore dhe zona të përbashkëta të përgjegjësisë BE dhe NATO”.

Pra, shtoi ai, “ne linjëzojmë 100% me fjalë, por edhe me vepra”.