Presidentja e Kosovës, Vjosa Osmani, edhe sot ka folur për vajzat e saj, për të cilat thotë se po ju cenohet privatësia. Presidentja Osmani ka theksuar se gjërat marrin një drejtim krejt tjetër kur sulmohen fëmijë të vegjël, të cilët nuk kanë asnjë faj që nëna e tyre mban qëndrime të caktuara politike, qëndrime për të cilat, Osmani thotë të jetë krenare e do të jetë gjithmonë, jo vetëm gjatë kohës sa është në politikë.
“Ajo që ndodhi dje, me publikimin e një sërë shpifjesh, është e papranueshme. Por besoj se për qytetarët e Kosovës, dhe për çdo prind, është e qartë se dy fëmijë të vegjël, në asnjë moment, nuk dëshirojnë të jenë të përcjellë nga mbrojtja e afërt. Kjo është shumë e dëmshme për psikologjinë e tyre, për rritjen e tyre. Është pengesa më e madhe për zhvillimin e vajzave të mia”, ka theksuar ajo.
Osmani, ka theksuar se vajzat e saj e urrejnë atë përcjellje, dhe nuk ka qenë kurrë zgjedhje e tyre.
“Ua pengojnë fëmijërinë normale, ua pengojnë qeshjen normale, lojën normale. Ato nuk duan asgjë tjetër, thjesht të luajnë, të mësojnë dhe të rriten si bashkëmoshatarët e tyre”, ka deklaruar Osmani.
Osmani, ka theksuar se rregullat e sigurisë e protokolleve të sigurisë nuk i ka shpikur ajo, të njëjtat kanë qenë edhe për presidentë paraprakë.
“Me ligj përcaktohet se presidenti ose presidentja kanë mbrojtje të afërt dhe e kanë nivelin e rrezikshmërisë së lartë. Kjo nënkupton ta zëmë te rasti im, te rasti i kryeministrit e kryetarit të Kuvendit, që subjekti që është i rrezikshmërisë së lartë ka rreth 12 policë në përcjellje. Çdo 6 muaj Policia e Kosovës e bënë vlerësimi e rrezikshmërisë, çdo 6 muaj konkluzioni është i njëjtë”, ka deklaruar ajo.
Presidentja ka theksuar se kërcënimet që ka marrë kanë qenë deri te dhunimi i vajzave.
Leave a Reply