Presidenti Begaj mandaton Edi Ramën për formimin e qeverisë së re

Presidenti i Republikës, Bajram Begaj, mandatoi sot (e premte) kryetarin e Partisë Socialiste, Edi Rama, për formimin e qeverisë së re.

Presidenti Begaj i dorëzoi dekretin e mandatimit kryesocialistit Rama mesditën e sotme në Presidencë.

Në dekretin e Presidentit, thuhet se Edi Rama emërohet Kryeministër i Shqipërisë. Në dekret gjithashtu thuhet se Kryeministri ushtron edhe përgjegjësitë për ngritjen dhe funksionimin e Ministrit Virtual të Inteligjencës Artificiale “Diella”.

Sipas procedurave, sekretari i Përgjithshëm i PS-së ka dërguar emrin e kryeministrit në Presidencë. Më pas, është kryeministri që paraqet emrat e kabinetit të ri në Presidencë.

Pas propozimit të Kryeministrit, Presidenti nxjerr dekretet individuale për secilin nga ministrat. Pas seancës së votëbesimit në Parlament, zhvillohet ceremonia e betimit të qeverisë.