Pas vendimit të Shteteve të Bashkuara të Amerikës për pezullim për kohë të pacaktuar të dialogut strategjik me Kosovën, ka reaguar Qeveria e Kosovës. Zëdhënësi Përparim Kryeziu ka shkruar se Republika e Kosovës është partneri më serioz i Shteteve të Bashkuara të Amerikës për stabilitet, siguri dhe paqe në rajon.
Kryeziu ka thënë se i mirëpresin edhe kritikat. “Kurdo që janë konkrete përpiqemi maksimalisht të përmirësojmë dhe korrigjojmë hapat e veprimet tona”, ka shkruar në shkrimin e gjatë që e ka publikuar në rrjete sociale, zëdhënësi Kryeziu, pas vendimit të Shteteve të Bashkuara.
Ai ka përmendur veprimet që i ka bërë qeveria e Kosovës në eliminim e vatrave të destabilitetit, me qëllim, siç ka shkruar ai, garantimin e stabilitetit të qëndrueshëm dhe afatgjatë.
Kryeziu, që është zëri i qeverisë, shkroi tutje se stabiliteti i sotëm është rezultat i natyrshëm i sundimit të ligjit dhe rendit publik. “Në Kosovë kurrë nuk ka pasur më shumë sundim ligji e luftim krimi e korrupsioni në gjithë territorin e Kosovës”, ka shkruar ai.
Leave a Reply