Polonia duhet të nxjerrë mësime nga shkelja e hapësirës së saj ajrore nga dronët rusë duke zgjeruar sistemin antidronë dhe duke rritur fondet për forcat e armatosura, tha sot presidenti polak, Karol Nawrocki.
Nawrocki bëri sot një përmbledhje të takimit të Këshillit të Sigurimit të Kombeve të Bashkuara, i cili u mblodh dje në mbrëmje me kërkesën e Polonisë për të diskutuar inkursionin e dronëve rusë në hapësirën ajrore polake natën e 9 shtatorit.
Gjatë transmetimit të drejtpërdrejtë nga televizioni privat ”Republika”, presidenti tha se takimi kishte të bënte me të ardhmen.
”Vendi ynë duhet të nxjerë mësime nga incidenti”, theksoi ai.
Sipas Nawrockit, kjo duhet të arrihet duke forcuar sistemet antidronë dhe “duke mos kursyer në zgjerimin e sistemit të sigurisë së forcave të armatosura polake”.
Ai përsëriti thirrjen e tij për të rritur përqindjen e shpenzimeve të PBB-së për mbrojtje nga 4,8 për qind, të planifikuara për vitin 2026, në 5,0 për qind.
Leave a Reply