Qeveria venezueliane njoftoi se një anije luftarake amerikane e tipit shkatërrues ka ndaluar, ka kontrolluar dhe ka mbajtur për tetë orë një anije peshkimi ton venezuelianet në ujërat e Zonës Ekonomike Ekskluzive të vendit në Amerikën e Jugut, të premten.
Në një deklaratë të lexuar nga ministri i Jashtëm i Venezuelës, Yvan Gil, thuhej se anija e peshkimit u kontrollua në mënyrë të paligjshme dhe armiqësore, ndërsa ekuipazhi i saj përbëhej nga nëntë peshkatarë “të thjeshtë” dhe “të padëmshëm”.
Qeveria venezueliane e identifikoi anijen amerikane si USS Jason Dunham (DDG-109), e “pajisur me raketa të fuqishme lundrimi dhe e manovruar nga marinsat shumë të specializuar”.
Karakasi zyrtar kërkoi që SHBA-ja të ndalojë menjëherë sulmet ndaj anijeve, duke theksuar se këto veprime rrezikojnë “sigurinë dhe paqen e Karaibeve”.
Administrata Trump ka pretenduar, pa prova, se presidenti venezuelian Nikolas Maduro po drejton një kartel për të përmbytur SHBA-në me drogë dhe ka dyfishuar shpërblimin për kapjen e tij nga 25 milionë në 50 milionë dollarë.
Leave a Reply