Këshilli i Lartë i Prokurorisë do të hapë garën për kreun e ri të Prokurorisë së Posaçme Kundër Korrupsionit dhe Krimit të Organizuar (SPAK), në përfundim të mandatit të kreut aktual Altin Dumani. KLP njoftoi agjendën e mbledhjes së datës 17 shtator, ku pikë e parë në rendin e ditës do të jetë diskutimi dhe miratimi i projektvendimit “Për shpalljen e vendit vakant për Drejtues të Prokurorisë së Posaçme kundër Korrupsionit dhe Krimit të Organizuar”.
Kjo mbledhje do të organizohet në sallën e mbledhjeve në prezencë të anëtarëve të Këshillit të Lartë të Prokurorisë, si dhe përfaqësuesve nga Prokurori i Përgjithshëm, Ministria e Drejtësisë, Projekti Eu4Justice dhe Programi OPDAT, në prani edhe të medies.
Në 16 dhjetor 2022, Altin Dumani u zgjodh kryetar i ri i Strukturës së Posaçme Kundër Korrupsionit dhe Krimit të Organizuar (SPAK), një detyrë që e ushtroi prej 3 vitesh.
Dumani kishte një karrierë prej 23 vitesh në sistemin e drejtësisë e nisur që në vitin 1999 si oficer i Policisë Gjyqësore në Sarandë, më pas drejtues i prokurorisë të Rrethit Gjyqësor Tropojë.
Prokuroria e Posaçme Kundër Krimit të organizuar dhe Korrupsionit u krijua më datë 19 dhjetor 2019, si një nga institucionet e reja të Reformës në Drejtësi.
Tetë prokurorët e SPAK kanë një mandat 9-vjeçar, ndërsa mandati i kreut të SPAK është 3 vjet pa të drejtë rizgjedhjeje.
Altin Dumani zëvendësoi në këtë detyrë Arben Krajën.
Leave a Reply