Rusia do ta konsideronte mbrojtjen e hapësirës ajrore ukrainase nga forcat e NATO-s si një deklaratë lufte, tha sot (e hënë) ish-presidenti rus Dmitri Medvedev. “Zbatimi i idesë provokuese të Kievit dhe idiotëve të tjerë për të krijuar një zonë ndalim-fluturimi mbi Ukrainën dhe lejimi i vendeve të NATO-s të rrëzojnë dronët tanë do të thotë vetëm një gjë, luftën e NATO-s me Rusinë”, shkroi politikani në Telegram.
Pasi një mori’ dronësh rusë shkelën hapësirën ajrore polake javën e kaluar, NATO vendosi avionë luftarakë shtesë përgjatë krahut të saj lindor.
Kjo nxiti diskutime të reja në Evropë rreth zgjerimit të mbrojtjes në Ukrainën perëndimore dhe rrëzimit të dronëve ose raketave ruse që po vinin atje.
Që nga fillimi i pushtimit në shkallë të gjerë në vitin 2022, Ukraina ka bërë thirrje për një zonë ndalim-fluturimi të zbatuar nga NATO.
Por, aleatët perëndimorë të Kievit deri më tani janë përmbajtur nga një hap i tillë, duke pasur frikë nga një përballje e drejtpërdrejtë ushtarake me Moskën.
Medvedev, i cili tani ushtron pushtet të konsiderueshëm në Rusi si zëvendëskryetar i Këshillit të Sigurisë së Rusisë, kërcënoi gjithashtu me hakmarrje nëse asetet shtetërore të Rusisë, të ngrira në Bashkimin Evropian, do t’i paguheshin Ukrainës si pjesë e një kredie dëmshpërblimi.
”Moska do t’i ndiqte penalisht shtetet dhe politikanët përgjegjës të BE-së në të gjitha gjykatat e mundshme ndërkombëtare dhe kombëtare – dhe në disa raste, jashtë tyre”, deklaroi ai.
Leave a Reply