Presidenti i SHBA-së, Donald Trump, përshëndeti sot (e enjte) lidhjen “e pathyeshme” midis Shteteve të Bashkuara të Amerikës dhe Britanisë së Madhe – ndërsa u takua me kryeministrin britanik, Keir Starmer. “Kjo është një ditë e shkëlqyer për lidhjen e veçantë të vendeve tona”, tha Starmer ndërsa të dy liderët u takuan me krerët e biznesit, në Chequers.
“Marrëdhënia Britani e Madhe-SHBA është themeli i sigurisë sonë, lirisë sonë dhe prosperitetit tonë”, tha Starmer.
Të dy udhëheqësit nënshkruan një marrëveshje për prosperitetin teknologjik, që parashikon investime të mëdha nga kompanitë amerikane të teknologjisë në Britaninë e Madhe, që do të ndihmojnë në zhvillimin e aftësive të inteligjencës artificiale.
“Lidhjet transatlantike janë të paçmuara dhe mendoj se kjo që kemi, është një lidhje e pathyeshme”, tha Trump.
“Kjo marrëveshje do të ndihmojë gjithashtu Amerikën dhe aleatët tanë britanikë të dominojnë të ardhmen e inteligjencës artificiale”, tha ai.
Britania e Madhe dhe SHBA-ja kanë rënë dakord për një bashkëpunim më të ngushtë mbi energjinë bërthamore.
Trump theksoi se qendrat e të dhënave të inteligjencës artificiale kishin nevojë për një sasi të madhe energjie elektrike.
“SHBA-ja po ia kalon Kinës dhe botës në sektorin e inteligjencës artificiale”, shtoi ai.
“Britania e Madhe është një nga ekonomitë më të mëdha në botë, ndoshta jo në shkallën e SHBA-së, e pranoj, por ne jemi më të mirët dhe e udhëheqim botën në ekspertizën kuantike, inteligjencën artificiale, shkencat e jetës, shërbimet financiare dhe shumë të tjera”, tha Starmer.
Ai tha se marrëveshja teknologjike, e nënshkruar gjatë vizitës së dytë shtetërore të Trump, shënoi një ditë të shkëlqyer për marrëdhënien e veçantë mes dy vendeve.
Leave a Reply