Ushtruesi i detyrës së drejtorit të përgjithshëm të RTK-së, Hysen Hundozi përmes një mesazhi ka uruar stafin e transmetuesit publik në 26-vjetorin e themelimit.
Ai ka thënë se ky përvjetor nuk është vetëm një ditë për t’u shënuar, por edhe një moment reflektimi për rrugën e kaluar dhe planet për të ardhmen.
“Të gjithë jemi të vetëdijshëm për situatën aktuale, kryesisht si pasojë e mungesës së funksionalitetit të Bordit, bllokimit të Kuvendit dhe moszgjidhjes me ligj të çështjes së financimit dhe pronës së RTK-së. Përkundër këtyre sfidave, kemi dëshmuar se edhe në rrethana të jashtëzakonshme mund të ruajmë funksionalitetin e institucionit. RTK mbetet shtëpia e përbashkët e të gjithë qytetarëve të Kosovës dhe e diasporës sonë. Kjo na obligon të punojmë për reforma të vërteta që forcojnë zbatimin e standardeve profesionale, pasurojnë ofertën programore dhe hapin dyert për profesionistë të rinj e ide kreative”, ka shkruar Hundozi.
Ai tutje ka thënë se është thelbësore që të gjithë të punësuarit e RTK-së të shërbejnë si shembull i profesionalizmit, përgjegjësisë dhe integritetit, qoftë në platformat e RTK-së apo në rrjetet sociale personale, duke reflektuar gjithmonë vlerat e një transmetuesi publik.
“Qëllimi ynë është të shtojmë besimin dhe përkrahjen e publikut, si parakusht për zhvillim, stabilitet dhe zgjerim të RTK-së. Po ashtu, synojmë të tërheqim audienca të reja, të përshtatemi me trendet mediale e teknologjike dhe të ndërtojmë ura besimi me qytetarët brenda dhe jashtë vendit”, ka nënvizuar Hundozi.
Leave a Reply