Sekretari i Përgjithshëm i Kombeve të Bashkuara, Antonio Guterres, deklaroi se bota nuk duhet të ndihet e “frikësuar” nga Izraeli dhe planet e tij për aneksimin gradual të Bregut Perëndimor.
Në një intervistë në Nju Jork, përpara sesionit të 80-të të Asamblesë së Përgjithshme të OKB-së, Guterres paralajmëroi gjithashtu se përpjekjet për të kufizuar ngrohjen globale në 1.5 gradë Celsius janë në rrezik “kolapsi”.
Sipas tij, mbi 140 liderë shtetesh dhe qeverish do të mblidhen në javën e ardhshme në Nju Jork, ku pritet që 10 vende të njohin shtetin palestinez, pavarësisht kundërshtimeve të ashpra të Izraelit. Raportohet se Izraeli ka kërcënuar me aneksim të Bregut Perëndimor nëse vendet perëndimore vazhdojnë me këtë plan.
“Ne nuk duhet të ndihemi të frikësuar nga rreziku i hakmarrjes”, tha Guterres. Ai e përshkroi situatën në Gaza si “të tmerrshme, duke shtuar se është niveli më i rëndë i vdekshmërisë dhe shkatërrimit që ka parë gjatë mandatit të tij.
Nga ana tjetër, ministri izraelit i Financave, Bezalel Smotrich, ka kërkuar aneksimin e zonave të mëdha të Bregut Perëndimor për të “varrosur idenë e një shteti palestinez”. Ndërkohë, SHBA-ja ka shmangur çdo kritikë ndaj Izraelit, duke qortuar madje edhe aleatët e saj që kanë shpallur mbështetjen për shtetësinë palestineze.
Përveç konfliktit në Lindjen e Mesme, në axhendën e javës së lartë të OKB-së do të jetë edhe kriza klimatike. Guterres paralajmëroi se objektivat e Marrëveshjes së Parisit rrezikojnë të dështojnë, pasi shumë vende nuk kanë dorëzuar planet e tyre kombëtare për reduktimin e emetimeve. “Jemi në prag të shembjes së këtij objektivi”, tha ai, duke bërë thirrje për veprime urgjente para samitit të klimës “COP30” në Brazil.
Leave a Reply