Kryeministri Edi Rama nënvizoi rëndësinë e garantimit dhe konsolidimit të pavarësisë së sistemit gjyqësor, ndërsa solli në vëmendje “vendimin historik të kësaj mazhorance për të mbajtur duart larg nga vendimmarrjet e prokurorëve dhe gjykatësve”.
Gjatë prezantimit të Ministrit të Drejtësisë, Besfort Lamallari, kryeministri Rama u shpreh se është shumë e rëndësishme që në të gjithë përditshmërinë e punës së kësaj ministrie, të mos humbë nga vëmendja thelbi i misionit tonë në raport me drejtësinë.
“Kjo është të garantojmë dhe konsolidojmë pavarësinë e sistemit tonë gjyqësor si një pushtet kushtetues i pavarur nga ekzekutivi në letër, por vetëm prej shumë pak vitesh i pavarur edhe në realitet”, tha Rama.
Kryeministri theksoi se “kjo është një pavarësi që është larg së qeni e garantuar përgjithmonë dhe që jemi ne pikërisht që duhet ta garantojmë dhe konsolidojmë në këtë fazë”.
“Kjo arrihet duke këmbëngulur në atë vendimin historik që kemi marrë për të mbajtur duart larg vendimmarrjeve të prokurorëve dhe gjykatësve. Është fakt që ne nuk kemi hyrë në asnjë rast dhe për asnjë rast në përmbajtjen e një çështjeje me të cilën është marrë drejtësia dhe nuk duam ta bëjmë këtë dhe nuk do ta bëjmë këtë as sot dhe as nesër”, tha Rama.
Leave a Reply