Me pak gjasa për t’u bërë anëtare e NATO-s, Ukraina po ndjek një strategji alternative për të përballuar agresionin rus, aleatët perëndimorë po investojnë miliarda dollarë në industrinë ukrainase të armëve, duke e bërë vendin më të aftë të mbrojë veten dhe potencialisht të furnizojë edhe ushtritë amerikane dhe evropiane me teknologji të avancuar ushtarake, sipas AP.
Një nga arritjet më të fundit është një “dron kuadkopter” që shmang pajisjet ruse të bllokimit, fluturon mbi 20 kilometra dhe mund të lëshojë gjashtë kilogramë eksploziv të drejtuar mbi tanke dhe objektiva të tjerë me vlerë të lartë.
“Ukrainasit janë liderë botërorë në teknologjinë e dronëve”, tha Keith Kellogg, i dërguari i posaçëm i administratës Trump për Ukrainën, gjatë një konference në Kiev. “Ne po punojmë me ukrainasit për të siguruar një shkëmbim të rëndësishëm teknologjik në këtë fushë”.
Evropianët po e marrin më seriozisht kërcënimin rus, sidomos që nga fillimi i mandatit të dytë të Trump, kur u theksua se vendet e NATO-s nuk duhet të mbështeten tepër tek SHBA –ja për mbrojtje.
Ankthi u rrit edhe më shumë javën e kaluar, pasi dronë rusë të lëshuar nga Bjellorusia u rrëzuan në hapësirën ajrore polake, duke nxitur shqetësime mbi sigurinë rajonale.
Ekspertët shohin investimet në industrinë e armëve si një strategji afatgjatë: përveç mbrojtjes së Ukrainës, kjo mund të krijojë mundësi për eksport të teknologjive ushtarake, duke forcuar pozicionin e vendit në aleancën perëndimore dhe duke kontribuar në pajisjen e ushtrive të tjera me dronë dhe sisteme të sofistikuara.
Në një kohë kur konflikti me Rusinë vazhdon, zhvillimi i brendshëm i armëve shihet si një hap kritik përmbrojtjen kombëtare dhe stabilitetin rajonal, duke i dhënë Ukrainës mjete të avancuara për të kundërshtuar kërcënimet dhe për të mbështetur aleatët perëndimorë.
Leave a Reply