Ministrja e Punëve të Brendshme, Albana Koçiu, konfirmoi se ka larguar nga detyra zëvendësin e saj, Andi Mahila, pas publikimeve në shtyp. Pa përmendur emrin e zv/minstrit, titullarja e re tha se ka “marrë një denoncim nga një bashkatdhetari ynë në Nju-Jork, i cili bashkë me familjen kishte përjetuar shqetësim për faktin se zv/ministri i Brendshëm tymoste cigare në restorant”.
“Bëra verifikimin përkatës dhe i komunikova zv/ministrit largimin nga detyra. Çdokush mund të gabojë padashje dhe mund të mirëkuptohet, por të pish cigare brenda në lokal nuk është një gabim padashje, po një shkelje e pajustifikueshme e ligjit. Aq më tepër për një drejtues të një institucioni si Ministria e Punëve të Brendshme. Nga ana ime e kam njoftuar bashkëatdhetarin që dërgoi mesazhin, se shqetësimi i tij i drejtë nuk ra në vesh të shurdhër”, tha ministrja.
Ajo siguroi “të gjithë qytetarët që do të denoncojnë shkelje të cilitdoqoftë, se do të dëgjohen me të njëjtin respekt. Jo vetëm me fjalë po me qëndrimet parimore që ata me plot të drejtë presin prej nesh”.
Leave a Reply